Рўмол ўраган эркаклар: Ўзбекистонда аёллар кийимида юрган яна бир эркак ушланди

Андижон ИИБга кўра, Андижон шаҳридаги болалар боғида Шаҳрихон туманида истиқомат қилувчи эркак аёлларга хос кийиниб, юзини тўсиб олган. У бу қилмиши учун маъмурий жавобгарлик тўғрисидаги кодекснинг 184-4-моддаси (жамоат жойларида шахсини идентификатсия қилиш имконини бермайдиган кўринишда бўлиш) айби билан базавий ҳисоблаш миқдорининг 15 баравари миқдорда жаримага тортилган. 

Шунингдек, жорий йилнинг 19 июнь куни пойтахтнинг Шайхонтоҳур туманида жойлашган "Чорсу" бозори олдида таниб бўлмас даражада юзини тўсиб, йўлда кетаётган фуқаро ИИО ходимлари томонидан ушланади. Дастлаб у ходимларга хизмат вазифасини бажаришига рухсат бермасдан қаршилик кўрсатган. Шундан сўнг, фуқаро шахсини аниқлаш учун ИИБ биносига олиб кетилган. Мазкур жараёнда унинг аёл эмас, эркак эканлиги маълум бўлган. 

20 июнь куни Жиноят ишлари бўйича Шайхонтоҳур туман судида унга қарши очилган маъмурий иш кўриб чиқилган. У Маъмурий жавобгарлик тўғрисидаги кодекснинг 184-4-моддаси (жамоат жойларида шахсини идентификатсия қилиш имконини бермайдиган кўринишда бўлиш) ҳамда 195-моддаси (Ички ишлар органлари ходимларининг ўз хизмат бурчларини бажаришларига қаршилик кўрсатиш)да назарда тутилган ҳуқуқбузарликларни содир этишда айбдор деб топилган. Унга БҲМнинг 10 баравари (3 млн 400 минг сўм) миқдорида жарима жазоси ва 15 сутка маъмурий қамоқ жазоси тайинланган. 

Бундан ташқари, 23 июль куни ҳам Қўйлиқ деҳқон бозори ерости йўлида юзини беркитиб, аёллар кийимини кийиб олган эркак ИИО ходимлари томонидан ушланган. Мазкур фуқарога 7 сутка маъмурий қамоқ ҳамда 3,4 млн сўм жарима жазоси тайинланган. 

Юқорида келтирилган фуқароларнинг нима сабабдан аёлларнинг кийимини кийиниб, юзини беркитгани очиқланмаган. Ҳозирда мазкур ҳолатлар одамлар томонидан турли талқинларга сабаб бўлмоқда. Ҳатто улар орасида бундай ҳодисалар атайлаб уриштирилаётганини таъкидлаётганлар ҳам бор. 

Маълумот учун, 2023 йилнинг 31 октябрь куни Ўзбекистонда жамоат жойларида юзни тўсиб юришга қарши қонун кучга киритилган. Mаъмурий жавобгарлик тўғрисидаги кодекснинг янги 184-4-моддасига асосан бурқа ёки ниқоб таққанларга нисбатан иш очилишини таъкидланган.