Оҳангарондаги видеомурожаат Омбудсман назоратига олинди

Мазкур ҳолат Олий Мажлиснинг Инсон ҳуқуқлари бўйича вакили (Омбудсман) томонидан назоратга олиниб ўрганилди.

Видеомурожаатда А.Халиқовга нисбатан Жиноят ишлари бўйича Оҳангарон шаҳар суди томонидан 7 сутка маъмурий қамоқ жазоси тайинлангани, аммо у белгиланган жой ўрнига шаҳар прокуратурасига олиб борилгани, шунингдек, овқат берилмаётгани ва адвокати билан учраштирилмаётгани ҳақида иддаолар билдирилган.

Маълум қилинишича, Омбудсман ушбу хабар эълон қилинган куниёқ Бош прокуратурага назорат хати киритган.

Шунингдек, 6 май куни Омбудсманнинг Тошкент вилоятидаги минтақавий вакили А.Халиқов сақланаётган махсус қабулхонага бориб, у билан учрашган.

Суҳбат давомида А.Халиқов махсус қабулхонада сақланаётгани, унга белгиланган тартибда озиқ-овқат берилаётгани ҳамда сақлаш шароити бўйича шикояти йўқлигини маълум қилган.

7 май куни А.Халиқовнинг маъмурий қамоқ муддати тугаб, у озод қилинган. Шу куни у ижтимоий тармоқларда тарқалган ҳолат юзасидан текширув ҳаракатлари доирасида Тошкент вилояти прокуратураси тергов бўлимига юборилган.

Олий Мажлиснинг Инсон ҳуқуқлари бўйича вакили (Омбудсман) мазкур ҳолат юзасидан кузатувни давом эттиришини маълум қилди.