ЙПХ ходимини обрўсизлантиришга қаратилган видео тарқатган фуқаро 10 суткага қамалди

Қашқадарё вилояти ИИБ Жамоат хавфсизлиги департаменти Йўл ҳаракати хавфсизлиги бошқармаси ахборот хизмати маълум қилишича, фуқаро ЙПХ ходимининг хизмат фаолиятига оид видеони ўзининг ижтимоий тармоқдаги саҳифасига жойлаштирган.

Мазкур ҳолат юзасидан ҳуқуқни муҳофаза қилувчи органлар томонидан ўрганиш ўтказилиб, фуқарога нисбатан маъмурий ҳуқуқбузарлик тўғрисида иш қўзғатилган.

Суднинг 2026 йил 24 сентябрдаги қарори билан фуқаро Рўйиддиновга нисбатан 10 сутка маъмурий қамоқ жазоси тайинланган. Бу ҳақда Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати хабар берди.

Қандай ҳолатлар жавобгарликка сабаб бўлади?

Мазкур ҳолат Маъмурий жавобгарлик тўғрисидаги кодекснинг 195²-моддаси билан боғлиқ.

Ушбу нормага кўра, ҳуқуқни муҳофаза қилувчи органлар ходимларининг жамоат хавфсизлигини таъминлаш бўйича хизмат вазифаларини бажараётган вақтида олинган фото ва видеотасвирларни уларни обрўсизлантиришга олиб келадиган тарзда бузиб тарқатиш, жумладан интернетда тарқатиш маъмурий жавобгарликка сабаб бўлади.

Муҳим жиҳати шундаки, амалдаги тартиб фуқароларга ҳуқуқни муҳофаза қилувчи орган ходимларини суратга ёки видеога олишни тақиқламайди.

Шунингдек, жамоатчилик назорати доирасида тасвирларни тарқатиш ҳуқуқи ҳам сақлаб қолинган.

Жавобгарлик, асосан, тасвирни ходимни обрўсизлантиришга олиб келадиган тарзда бузиб кўрсатиш, монтаж қилиш ёки воқеа-ҳодисани нотўғри акс эттириш каби ҳолатларга тааллуқли.

Жазо миқдори қанча?

2025 йилда норма қайта кўриб чиқилиб, аввалги лойиҳада назарда тутилган қатъий 50 БҲМ жарима ва 15 суткагача қамоқ жазоси юмшатилган. Амалдаги санкцияда 20–50 БҲМ миқдорида жарима ёки 10 суткагача маъмурий қамоқ назарда тутилган.

Муаллиф: Ҳасанбой ОЧУН