Ўзбекистон Гвинея-Бисау ва Руанда билан дипломатик алоқалар ўрнатди

Ўзбекистон – Гвинея-Бисау

2026 йил 22 апрель куни Нью-Йорк шаҳрида Ўзбекистоннинг БМТдаги доимий вакили Улуғбек Лапасов ва Гвинея-Бисаунинг БМТдаги миссияси раҳбари Самба Сане дипломатик алоқалар ўрнатиш тўғрисидаги Қўшма коммюникени имзолади, деб хабар бермоқда “Дунё” ахборот агентлиги мухбири.

Томонлар халқаро ташкилотлар, жумладан, БМТ ва унинг ихтисослашган муассасалари доирасида ҳамкорликни мустаҳкамлашдан манфаатдор эканини билдирди.

Икки томонлама алоқаларнинг ўзаро манфаатли йўналишларини топиш бўйича ҳамкорликни фаоллаштиришга келишиб олинди.

Ғарбий Африка давлати бўлган Гвинея-Бисау Республикаси Ўзбекистон дипломатик алоқалар ўрнатган 168-мамлакатга айланди. Мамлакат шимолда Сенегал, шарқ ва жануби-шарқда Гвинея билан чегарадош. Ғарб томони Атлантика океани билан ювилади.

Ўзбекистон – Руанда

Аввалроқ, 2026 йил 19 апрель куни Анталия шаҳрида Ўзбекистон ва Руанда ташқи ишлар вазирлари Бахтиёр Саидов ва Оливе Ндухунгирехе дипломатик алоқалар ўрнатиш тўғрисидаги Қўшма коммюникени имзолаган эди.

“Руанда Ўзбекистон билан дипломатик муносабатлар ўрнатган 167-давлат бўлди, – деб ёзди Ўзбекистон ТИВ раҳбари ўзининг телеграм-каналида. – Руанда ташқи ишлар ва халқаро ҳамкорлик вазири Оливе Ндуҳунгиреҳе билан биргаликда дипломатик муносабатлар ўрнатиш тўғрисидаги Қўшма коммюникени имзоладик".

Шунингдек, икки давлат ташқи ишлар вазирликлари ўртасида сиёсий маслаҳатлашувлар механизмини ўрнатиш тўғрисидаги Англашув меморандуми ҳам имзоланган.