O‘zbekiston Gvineya-Bisau va Ruanda bilan diplomatik aloqalar o‘rnatdi

O‘zbekiston – Gvineya-Bisau

2026-yil 22-aprel kuni Nyu-York shahrida O‘zbekistonning BMTdagi doimiy vakili Ulug‘bek Lapasov va Gvineya-Bisauning BMTdagi missiyasi rahbari Samba Sane diplomatik aloqalar o‘rnatish to‘g‘risidagi Qo‘shma kommyunikeni imzoladi, deb xabar bermoqda “Dunyo” axborot agentligi muxbiri.

Tomonlar xalqaro tashkilotlar, jumladan, BMT va uning ixtisoslashgan muassasalari doirasida hamkorlikni mustahkamlashdan manfaatdor ekanini bildirdi.

Ikki tomonlama aloqalarning o‘zaro manfaatli yo‘nalishlarini topish bo‘yicha hamkorlikni faollashtirishga kelishib olindi.

G‘arbiy Afrika davlati bo‘lgan Gvineya-Bisau Respublikasi O‘zbekiston diplomatik aloqalar o‘rnatgan 168-mamlakatga aylandi. Mamlakat shimolda Senegal, sharq va janubi-sharqda Gvineya bilan chegaradosh. G‘arb tomoni Atlantika okeani bilan yuviladi.

O‘zbekiston – Ruanda

Avvalroq, 2026-yil 19-aprel kuni Antaliya shahrida O‘zbekiston va Ruanda tashqi ishlar vazirlari Baxtiyor Saidov va Olive Nduxungirexe diplomatik aloqalar o‘rnatish to‘g‘risidagi Qo‘shma kommyunikeni imzolagan edi.

“Ruanda O‘zbekiston bilan diplomatik munosabatlar o‘rnatgan 167-davlat bo‘ldi, – deb yozdi O‘zbekiston TIV rahbari o‘zining telegram-kanalida. – Ruanda tashqi ishlar va xalqaro hamkorlik vaziri Olive Nduhungirehe bilan birgalikda diplomatik munosabatlar o‘rnatish to‘g‘risidagi Qo‘shma kommyunikeni imzoladik.

Shuningdek, ikki davlat tashqi ishlar vazirliklari o‘rtasida siyosiy maslahatlashuvlar mexanizmini o‘rnatish to‘g‘risidagi Anglashuv memorandumi ham imzolangan.