Путин Япония даъво қиладиган оролга ташриф буюрди. Токио бундан норози

Россия президенти Владимир Путин 13 август куни Япония яқинидаги баҳсли оролга ташриф буюрди. Бу эса Токионинг кескин норозилигига сабаб бўлди.

Расмий Токио Путиннинг мазкур ҳаракатлари икки мамлакат ўртасидаги муносабатларни яхшилаш ўрнига оғирлаштирганини маълум қилди.

Россия ва Япония ўртасидаги баҳсли ороллар

Россияда Итуруп, Японияда эса Эторофу номи билан машҳур бўлган ушбу орол Курил тизмасидаги тўртта оролдан бири бўлиб, улар Иккинчи жаҳон урушида Япония таслим бўлганидан сўнг Москва томонидан эгаллаб олинган.

Токио оролларга ҳали ҳам даъво қилади. Япониянинг таъкидлашича, уларнинг қайтарилиши яқин иқтисодий ҳамкорликка йўл очадиган тинчлик шартномаси имзолашнинг асосий шартидир.

“Бу япон халқининг қадрини ерга уради ва мутлақо қабул қилиб бўлмайдиган ҳолатдир. Россия масаланинг жиддийлигини чуқур англаб етишидан умидвормиз”, - деди Бош вазир Санаэ Такаичи телевидение орқали қилган баёнотида.

2022 йилда Путин Украинага кенг кўламли босқинни бошлаш ҳақида буйруқ берганидан сўнг Москва ва Токио ўртасидаги муносабатлар кескинлашди. Япония бошқа давлатлар қатори ушбу ҳужумни қоралаб, Россияга қарши санкциялар жорий қилди.

Дмитрий Медведев 2010 йилда баҳсли ҳудудга борган биринчи Россия раҳбари бўлган.

Курил ороллари — тинчлик шартномасига тўсиқ

Ороллар бўйича ҳал этилмаган ҳудудий низо асосий тўсиқ бўлгани сабаб Москва ва Токио Иккинчи жаҳон урушидан бери расмий тинчлик шартномасини имзоламаган.

Пайшанба куни Россиянинг Япониядаги элчиси Николай Ноздрев ва Хитой элчиси Ву Сзяньхао қўшма баёнот бериб, Иккинчи жаҳон уруши натижаларини қайта кўриб чиқишга бўлган уринишларга қарши эканлигини маълум қилди.

Шунингдек, улар Осиё-Тинч океани минтақасининг қайта ҳарбийлаштиришдан огоҳлантирди. Бу эса Москванинг Япониянинг оролларга бўлган даъвосини рад этишига ҳамоҳангдир.