Putin Yaponiya da’vo qiladigan orolga tashrif buyurdi. Tokio bundan norozi

Rossiya prezidenti Vladimir Putin 13-avgust kuni Yaponiya yaqinidagi bahsli orolga tashrif buyurdi. Bu esa Tokioning keskin noroziligiga sabab bo‘ldi.

Rasmiy Tokio Putinning mazkur harakatlari ikki mamlakat o‘rtasidagi munosabatlarni yaxshilash o‘rniga og‘irlashtirganini ma’lum qildi.

Rossiya va Yaponiya o‘rtasidagi bahsli orollar

Rossiyada Iturup, Yaponiyada esa Etorofu nomi bilan mashhur bo‘lgan ushbu orol Kuril tizmasidagi to‘rtta oroldan biri bo‘lib, ular Ikkinchi jahon urushida Yaponiya taslim bo‘lganidan so‘ng Moskva tomonidan egallab olingan.

Tokio orollarga haliyam da’vo qiladi. Yaponiyaning ta’kidlashicha, ularning qaytarilishi yaqin iqtisodiy hamkorlikka yo‘l ochadigan tinchlik shartnomasi imzolashning asosiy shartidir.

“Bu yapon xalqining qadrini yerga uradi va mutlaqo qabul qilib bo‘lmaydigan holatdir. Rossiya masalaning jiddiyligini chuqur anglab yetishidan umidvormiz”, - dedi Bosh vazir Sanae Takaichi televideniye orqali qilgan bayonotida.

2022-yilda Putin Ukrainaga keng ko‘lamli bosqinni boshlash haqida buyruq berganidan so‘ng Moskva va Tokio o‘rtasidagi munosabatlar keskinlashdi. Yaponiya boshqa davlatlar qatori ushbu hujumni qoralab, Rossiyaga qarshi sanksiyalar joriy qildi.

Dmitriy Medvedev 2010-yilda bahsli hududga borgan birinchi Rossiya rahbari bo‘lgan.

Kuril orollari — tinchlik shartnomasiga to‘siq

Orollar bo‘yicha hal etilmagan hududiy nizo asosiy to‘siq bo‘lgani sabab Moskva va Tokio Ikkinchi jahon urushidan beri rasmiy tinchlik shartnomasini imzolamagan.

Payshanba kuni Rossiyaning Yaponiyadagi elchisi Nikolay Nozdrev va Xitoy elchisi Vu Szyanxao qo‘shma bayonot berib, Ikkinchi jahon urushi natijalarini qayta ko‘rib chiqishga bo‘lgan urinishlarga qarshi ekanligini ma’lum qildi.

Shuningdek, ular Osiyo-Tinch okeani mintaqasining qayta harbiylashtirishdan ogohlantirdi. Bu esa Moskvaning Yaponiyaning orollarga bo‘lgan da’vosini rad etishiga hamohangdir.