Financial Times: Ўзбекистоннинг минтақадаги таъсири кучаймоқда

“Мини-ўрта давлат” атамаси глобал тартибни мустақил равишда белгилай олмайдиган, аммо энергия, транспорт, молия, технология, хавфсизлик ёки дипломатия каби муайян йўналишларда муҳим таъсирга эга мамлакатларга нисбатан қўлланади.

Мақолада Қатар ва Уммоннинг дипломатик воситачиликдаги роли, Озарбайжон ва Қозоғистоннинг энергия ҳамда транспорт йўлакларидаги аҳамияти қайд этилган. Ўзбекистоннинг устунликлари сифатида эса аҳолиси, географик жойлашуви ва инфратузилмавий салоҳияти кўрсатилган.

Ўзбекистоннинг асосий устунлиги – катта бозор ва жойлашув

Миллий статистика қўмитаси маълумотига кўра, 2026 йил 15 июль ҳолатида Ўзбекистоннинг доимий аҳолиси 38 миллион 558 минг 575 нафарни ташкил этган. Бу мамлакатни Марказий Осиёдаги энг йирик ички бозорлардан бирига айлантиради.

Ўзбекистоннинг минтақанинг марказида жойлашгани ҳам унинг стратегик аҳамиятини оширади. Мамлакат минтақадаги савдо, транспорт ва энергетика лойиҳаларида муҳим иштирокчига айланиб бормоқда.

Ўрта йўлак Ўзбекистон учун муҳим имконият

Financial Times таҳлилида Ўзбекистон учун муҳим йўналишлардан бири сифатида Транскаспий халқаро транспорт йўлаги — Ўрта йўлак қайд этилган.

Ушбу йўналиш Хитой ва Марказий Осиёни Қозоғистон, Каспий денгизи, Озарбайжон ва Кавказ орқали Европа билан боғлайди.

Европа комиссияси маълумотига кўра, Транскаспий йўлагида юк ташиш ҳажми 2022 йилдан бери тўрт баравар ошган. Зарур инфратузилма ва инвестициялар таъминланса, 2030 йилгача савдо оқимлари яна уч бараварга ошиши мумкин.

Ўзбекистон ҳам ўзининг транзит салоҳиятини оширишга ҳаракат қилмоқда. Шу билан бирга, мамлакат Қозоғистон ва Озарбайжон билан Каспий орқали яшил энергия йўлакларини ривожлантириш бўйича ҳам ҳамкорлик қилмоқда.

Financial Times хулосасига кўра, “мини-ўрта давлатлар”нинг таъсири улар назорат қиладиган ресурслар, транспорт йўналишлари ёки дипломатик алоқалар бошқа мамлакатлар учун қанчалик муҳим бўлиб боришига боғлиқ.

Ўзбекистон глобал сиёсатни якка ўзи белгилайдиган давлат бўлмаса-да, Марказий Осиёдаги савдо йўллари, энергетика лойиҳалари ва минтақавий ҳамкорликда уни ҳисобга олмасдан йирик ташаббусларни амалга ошириш тобора қийинлашиб бормоқда.