Европа Иттифоқи Арманистонга ёрдам тариқасида 34 миллион евро ажратди

Европа Комиссияси Арманистонга Россиянинг савдо чекловлари мамлакат хусусий секторига кўрсатаётган таъсирини юмшатиш учун 34 миллион евро ажратди. Бу ҳақда  Европа Комиссиясининг расмий сайти маълум қилди.

Хабарда айтилишича, раис Урсула фон дер Ляеннинг Бош вазир Пашинян билан телефон мулоқотидан икки ҳафта ўтиб, Европа Иттифоқи Арманистон ва унинг халқини қўллаб-қувватлаш бўйича мажбуриятларини тезкорлик билан бажарган.

Мазкур молиявий кўмак Урсула фон дер Ляен томонидан эълон қилинган кенг қамровли ёрдам пакетининг биринчи қисмидир. Шунингдек, ушбу пакет Арманистоннинг иқтисодий барқарорлигини мустаҳкамлашга қаратилган савдо алоқаларини қулайлаштириш ва ҳамжиҳатлик чора-тадбирларини ҳам ўз ичига олади.

Ўтган ой Европа Иттифоқи–Арманистон саммитидаги келишувларга мувофиқ, Европа Иттифоқи ва Арманистон бизнес алоқаларини мустаҳкамлаш ҳамда арманистонлик ишлаб чиқарувчиларнинг бозорга чиқиш имкониятларини кенгайтириш йўлидаги ҳамкорликни давом эттиради.

Савдо чекловларидан зарар кўрган соҳаларга, жумладан, агросаноат маҳсулотлари, гулчилик ва бошқа экспортга йўналтирилган тармоқларга алоҳида ёрдам берилади. Бунинг учун савдо лойиҳалари ва бизнес-учрашувлар ташкил этилади.

Европа Иттифоқи–Арманистон Иқтисодий барқарорлик бўйича ишчи гуруҳи ушбу чораларни бошқариш ва кузатиб бориш мақсадида мунтазам йиғилишлар ўтказмоқда.

Кенгайиш масалалари бўйича комиссар Марта Коснинг айтишича, Европа Иттифоқи суверен, демократик ва мустақил давлат – Арманистонни қатъий қўллаб-қувватлайди.

“Бугунги ёрдам иқтисодий қийинчиликларни бартараф этишга кўмаклашиш билан бирга, Арманистон бизнесменлари учун минтақавий ва Европа бозорлари билан савдо қилишда янги имкониятлар яратади. Бу – Европа бирдамлигининг амалдаги ифодаси” – деди Марта Кос.

5 июль куни Комиссар Кос ёрдам дастурини амалга оширишни тезлаштириш ҳамда Европа Иттифоқи ва Арманистон ўртасидаги ҳамкорликни мустаҳкамлаш борасида навбатдаги қадамларни муҳокама қилиш учун Арманистонга ташриф буюради.

Аввалроқ Арманистондаги Европа сиёсий ҳамжамияти учрашувининг Марказий Осиёга таъсири ҳақида мақола чоп этгандик.