Yevropa Ittifoqi Armanistonga yordam tariqasida 34 million yevro ajratdi

Yevropa Komissiyasi Armanistonga Rossiyaning savdo cheklovlari mamlakat xususiy sektoriga ko‘rsatayotgan ta’sirini yumshatish uchun 34 million yevro ajratdi. Bu haqda  Yevropa Komissiyasining rasmiy sayti ma’lum qildi.

Xabarda aytilishicha, rais Ursula fon der Lyayenning Bosh vazir Pashinyan bilan telefon muloqotidan ikki hafta o‘tib, Yevropa Ittifoqi Armaniston va uning xalqini qo‘llab-quvvatlash bo‘yicha majburiyatlarini tezkorlik bilan bajargan.

Mazkur moliyaviy ko‘mak Ursula fon der Lyayen tomonidan e’lon qilingan keng qamrovli yordam paketining birinchi qismidir. Shuningdek, ushbu paket Armanistonning iqtisodiy barqarorligini mustahkamlashga qaratilgan savdo aloqalarini qulaylashtirish va hamjihatlik chora-tadbirlarini ham o‘z ichiga oladi.

O‘tgan oy Yevropa Ittifoqi–Armaniston sammitidagi kelishuvlarga muvofiq, Yevropa Ittifoqi va Armaniston biznes aloqalarini mustahkamlash hamda armanistonlik ishlab chiqaruvchilarning bozorga chiqish imkoniyatlarini kengaytirish yo‘lidagi hamkorlikni davom ettiradi.

Savdo cheklovlaridan zarar ko‘rgan sohalarga, jumladan, agrosanoat mahsulotlari, gulchilik va boshqa eksportga yo‘naltirilgan tarmoqlarga alohida yordam beriladi. Buning uchun savdo loyihalari va biznes-uchrashuvlar tashkil etiladi.

Yevropa Ittifoqi–Armaniston Iqtisodiy barqarorlik bo‘yicha ishchi guruhi ushbu choralarni boshqarish va kuzatib borish maqsadida muntazam yig‘ilishlar o‘tkazmoqda.

Kengayish masalalari bo‘yicha komissar Marta Kosning aytishicha, Yevropa Ittifoqi suveren, demokratik va mustaqil davlat – Armanistonni qat’iy qo‘llab-quvvatlaydi.

“Bugungi yordam iqtisodiy qiyinchiliklarni bartaraf etishga ko‘maklashish bilan birga, Armaniston biznesmenlari uchun mintaqaviy va Yevropa bozorlari bilan savdo qilishda yangi imkoniyatlar yaratadi. Bu – Yevropa birdamligining amaldagi ifodasi” – dedi Marta Kos.

5-iyul kuni Komissar Kos yordam dasturini amalga oshirishni tezlashtirish hamda Yevropa Ittifoqi va Armaniston o‘rtasidagi hamkorlikni mustahkamlash borasida navbatdagi qadamlarni muhokama qilish uchun Armanistonga tashrif buyuradi.

Avvalroq Armanistondagi Yevropa siyosiy hamjamiyati uchrashuvining Markaziy Osiyoga ta’siri haqida maqola chop etgandik.