15 миллион аҳолининг маълумотлари сиздирилгани ҳақидаги хабарларга расмий муносабат билдирилди

Ушбу маълумотлар жамоатчилик орасида жиддий хавотир уйғотди.

Мазкур ҳолат юзасидан Киберхавфсизлик маркази расмий изоҳ бериб, ҳозирда ҳолат ўрганилаётганини маълум қилди. Масъул идора фуқароларни шахсий аккаунтлари хавфсизлигини таъминлаш, мураккаб пароллардан фойдаланиш ва шубҳали ҳаволаларга кирмасликка чақирди.

Статистика агентлиги эса аҳолини рўйхатга олиш жараёнида тўпланган маълумотлар алоҳида серверларда шифрланган ҳолда сақланаётганини таъкидлади. Агентликка кўра, ушбу маълумотлар ташқи манбаларга чиқиб кетиши эҳтимоли мавжуд эмас.

Шунингдек, расмий муносабатда рўйхатга олиш жараёнида фуқароларнинг фотосуратлари олинмагани ва ҳеч қандай тасвирлар базага юкланмагани қайд этилди.

Айни пайтда айрим манбалар census.stat.uz сайтининг маълум муддат ишламай қолганини эҳтимолий киберҳужум билан боғламоқда. Мутахассислар эса бу ҳолат техник носозлик ёки маълумотлар хавфсизлигини таъминлаш мақсадида тизимнинг вақтинча ўчириб қўйилиши билан боғлиқ бўлиши мумкинлигини билдирмоқда.

Расмий идоралар аҳолини асоссиз хабарларга ишонмасликка ва фақат ишончли манбалар орқали тарқатилаётган маълумотларга таянишга чақирмоқда.