15 million aholining maʼlumotlari sizdirilgani haqidagi xabarlarga rasmiy munosabat bildirildi

Ushbu maʼlumotlar jamoatchilik orasida jiddiy xavotir uygʻotdi.

Mazkur holat yuzasidan Kiberxavfsizlik markazi rasmiy izoh berib, hozirda holat oʻrganilayotganini maʼlum qildi. Masʼul idora fuqarolarni shaxsiy akkauntlari xavfsizligini taʼminlash, murakkab parollardan foydalanish va shubhali havolalarga kirmaslikka chaqirdi.

Statistika agentligi esa aholini roʻyxatga olish jarayonida toʻplangan maʼlumotlar alohida serverlarda shifrlangan holda saqlanayotganini taʼkidladi. Agentlikka koʻra, ushbu maʼlumotlar tashqi manbalarga chiqib ketishi ehtimoli mavjud emas.

Shuningdek, rasmiy munosabatda roʻyxatga olish jarayonida fuqarolarning fotosuratlari olinmagani va hech qanday tasvirlar bazaga yuklanmagani qayd etildi.

Ayni paytda ayrim manbalar census.stat.uz saytining maʼlum muddat ishlamay qolganini ehtimoliy kiberhujum bilan bogʻlamoqda. Mutaxassislar esa bu holat texnik nosozlik yoki maʼlumotlar xavfsizligini taʼminlash maqsadida tizimning vaqtincha oʻchirib qoʻyilishi bilan bogʻliq boʻlishi mumkinligini bildirmoqda.

Rasmiy idoralar aholini asossiz xabarlarga ishonmaslikka va faqat ishonchli manbalar orqali tarqatilayotgan maʼlumotlarga tayanishga chaqirmoqda.