Ўзбекистонда никоҳлар ва туғилишлар сони камаймоқда

Ўзбекистонда сўнгги йилларда никоҳлар сони камайишда давом этмоқда. Статистика агентлиги маълумотларига кўра, 2026 йилнинг январь–июнь ойларида мамлакатда 92,3 мингта никоҳ расмийлаштирилган.

Никоҳлар сони 2021 йилда 305,2 мингтани ташкил этган бўлса, кейинги йилларда пасайиш кузатилди. 2022 йилда 296,7 мингта, 2023 йилда 283,8 мингта, 2024 йилда 271,8 мингта никоҳ қайд этилган. 2025 йилда эса бу кўрсаткич 267,1 мингтага тушган.

Никоҳлар сони 2021 йилдан буён камаймоқда

Мустақиллик йилларида Ўзбекистонда энг кўп никоҳ 2018 йилда қайд этилган — 311,4 мингта. 2021 йилда ҳам кўрсаткич юқори даражада бўлиб, 305,2 мингтани ташкил қилган.

Бироқ кейинги тўрт йил давомида никоҳлар сони 38,1 мингтага ёки қарийб 12,5 фоизга камайди. 2025 йилда қайд этилган никоҳлар сони 1991 йилдаги 270,3 мингта кўрсаткичдан ҳам бироз паст бўлди.

Никоҳлар сонининг энг паст кўрсаткичлари 1995–2000 йилларга тўғри келади. 1995 йилда 170,8 мингта, 2000 йилда эса 168,9 мингта никоҳ расмийлаштирилган.

Йиллар кесимида қайд этилган никоҳлар сони:

1991 йил — 270,3 мингта;

1995 йил — 170,8 мингта;

2000 йил — 168,9 мингта;

2005 йил — 184 мингта;

2010 йил — 292,3 мингта;

2015 йил — 287,6 мингта;

2018 йил — 311,4 мингта;

2020 йил — 296,8 мингта;

2021 йил — 305,2 мингта;

2022 йил — 296,7 мингта;

2023 йил — 283,8 мингта;

2024 йил — 271,8 мингта;

2025 йил — 267,1 мингта.

Туғилишлар сони ҳам пасаймоқда

Никоҳлар билан бир қаторда, Ўзбекистонда туғилишлар сони ҳам камаймоқда. 2025 йилда мамлакатда 879,6 мингта туғилиш қайд этилган. Бу 2024 йилга нисбатан 46,8 мингтага ёки қарийб 5 фоизга кам.

2026 йилнинг биринчи чорагида эса республикада 191,1 минг нафар чақалоқ туғилган. Бу сўнгги беш йилдаги биринчи чораклар орасидаги энг паст кўрсаткич ҳисобланади.

Таққослаш учун, 2024 йилнинг январь–мартида 205,7 мингта, 2025 йилнинг шу даврида эса 198,1 мингта туғилиш қайд этилган. Демак, 2026 йилнинг биринчи чорагида туғилишлар сони ўтган йилнинг мос даврига нисбатан 7 мингтага ёки қарийб 3,5 фоизга камайган.

Муаллиф: Ҳасанбой ОЧУН