Ўзбекистонда ўртача ойлик иш ҳақи 7 миллион сўмдан ошди

Ўзбекистонда 2026 йил II чораги якунларига кўра, ўртача ойлик номинал ҳисобланган иш ҳақи 7,09 миллион сўмга етди. Йил бошида ушбу кўрсаткич 6,83 миллион сўмни ташкил этган эди.

Миллий статистика қўмитасининг маълумотларига кўра, 2026 йил II чорагида мамлакатда ўртача ҳисобланган ойлик иш ҳақи 7 091,1 минг сўмни ташкил этган. Бу кўрсаткич 2026 йил I чорагидаги 6 825,9 минг сўмга нисбатан юқори.

Шу билан бирга, расмий статистикада иш ҳақи номинал ҳисобланган иш ҳақи сифатида келтирилади. Яъни бу рақам инфляция таъсири ҳисобга олинмаган ҳолда ҳисобланган ўртача кўрсаткич бўлиб, мамлакатдаги ҳар бир ходим айнан 7 миллион сўм маош олади, дегани эмас

Қайси соҳаларда маош энг юқори

2026 йил январь–март ойларида иқтисодий фаолият турлари бўйича энг юқори ўртача иш ҳақи молия соҳасида қайд этилган.

Жумладан:

Банк, суғурта, лизинг ва кредит фаолияти — 18,6 млн сўм;
ахборот ва алоқа — 16,5 млн сўм;
ташиш ва сақлаш — 10,7 млн сўм;
саноат — 8,03 млн сўм;
савдо — 7,21 млн сўм.
Қурилиш соҳасида ўртача иш ҳақи 6,5 млн сўмни ташкил этган. Таълим соҳасида бу кўрсаткич 4,62 млн сўм, соғлиқни сақлаш ва ижтимоий хизматлар соҳасида эса 4,11 млн сўм бўлган.
Иш ҳақи бир йилда қанча ошди?
Миллий статистика қўмитаси маълумотларида Ўзбекистонда ўртача ойлик иш ҳақининг сўнгги йилларда изчил ўсиб бораётгани кўринади.

Ўртача ойлик иш ҳақи йиллар кесимида

2022 йил
3,42 млн сўм

2023 йил
4,11 млн сўм

2024 йил
4,91 млн сўм

2025 йил
5,82 млн сўм

2026 йил I чорак
6,83 млн сўм

2026 йил II чорак
7,09 млн сўм

2026 йил январь–март ойларида ўртача ойлик номинал ҳисобланган иш ҳақи бир йил аввалги шу даврга нисбатан 17,4 фоизга ошган.

«Ўртача маош» нимани англатади?

Муҳим жиҳат — статистикадаги 7,09 миллион сўмлик кўрсаткич мамлакатдаги барча ходимларнинг маоши дегани эмас.

Ўртача иш ҳақи иқтисодиётдаги турли соҳалар, корхоналар ва ходимларнинг даромадлари асосида ҳисобланади. Шунинг учун юқори маош олинадиган молия, ахборот технологиялари ва алоқа каби соҳалардаги кўрсаткичлар умумий ўртача рақамнинг юқори бўлишига таъсир қилади.

Масалан, 2026 йил биринчи чорагида молия соҳасидаги ўртача иш ҳақи мамлакат бўйича умумий кўрсаткичдан қарийб уч баробар юқори бўлган

Ўртача иш ҳақи 7 миллион сўмдан ошиши нимани англатади?

Ўртача номинал иш ҳақининг 7 миллион сўмдан ошиши мамлакатда иш ҳақи кўрсаткичлари ўсиб бораётганини кўрсатади. 
Бироқ аҳолининг реал даромадлари ва турмуш даражасини баҳолашда фақат номинал иш ҳақига эмас, балки инфляция, истеъмол нархлари, ишсизлик ва аҳоли даромадлари каби бошқа кўрсаткичларга ҳам эътибор бериш керак.

Муаллиф: Ҳасанбой ОЧУН