5 млрд сўмлик кредитни ўзлаштиришда гумонланган ўзбекистонлик Туркияда ушланди

Бу ҳақда Ўзбекистон Республикасининг Истанбул шаҳридаги Бош консулхонаси хабар берди.

Маълум қилинишича, С.А. ажратилган кредит маблағларини ўзлаштириш ва растрата қилиш йўли билан талон-торож қилганликда гумон қилинган. Тергов маълумотларига кўра, мазкур ҳолат оқибатида давлат бюджетига жами 5 млрд сўм миқдорида зарар етказилган.

С.А. Ўзбекистон Республикаси Жиноят кодексининг 167-моддаси 3-қисми — ўзлаштириш ёки растрата йўли билан талон-торож қилиш билан боғлиқ жиноят иши доирасида халқаро қидирувга берилган.

Бош консулхона маълумотига кўра, у Туркия ҳудудида аниқланиб, қўлга олинган ва белгиланган тартибда Ўзбекистонга қайтарилган. Айни пайтда у тегишли тергов ва процессуал ҳаракатларни давом эттириш учун Ўзбекистоннинг ваколатли органларига топширилган.

Эслатма: С.А.нинг айби суд томонидан якуний тасдиқлангунига қадар у қонунчиликка мувофиқ айбсизлик презумпцияси асосида гумон қилинувчи ҳисобланади.

Муаллиф: Ҳасанбой ОЧУН