Туркия Нетаньяхуни Интерполга бермоқчи

Туркия Бош вазири Биньямин Нетаньяхуга нисбатан Интерполнинг «қизил бюллетени»ни чиқаришни сўради. Бу ҳақда мамлакат Адлия вазири Акин Гюрлек маълум қилди.

Унинг сўзларига кўра, сўров Ғазога гуманитар ёрдам етказиш учун йўлга чиққан Global Sumud Flotilla фаолларига халқаро сувларда қилинган ҳужум бўйича Туркияда давом этаётган жиноий иш доирасида юборилган.

Истанбулнинг 11-оғир жиноят ишлари судида ушбу иш бўйича 35 нафар айбланувчи, жумладан Нетаньяху ва Афек Московичга нисбатан суд жараёни давом этмоқда.

Туркия Адлия вазирлиги маълум қилишича, 2026 йил 14 июль куни Нетаньяху ва Московични ҳибсга олиш ҳақида қарор чиқарилган. Шундан сўнг уларни халқаро миқёсда қидириш учун Интерполнинг «қизил бюллетени»ни сўраш ташаббуси илгари сурилган. Ҳужжатлар Туркия Ташқи ишлар вазирлигига ҳам юборилган.

Туркия томони Нетаньяху ва Московичга нисбатан «инсониятга қарши жиноятлар», «геноцид», оғирлаштирувчи ҳолатларда озодликдан маҳрум қилиш, қасддан тан жароҳати етказиш, қийноқ, мулкка зарар етказиш, талончилик ва транспорт воситаларини олиб қўйиш каби айбловларни илгари сурмоқда.

Акин Гюрлек Туркия Ғазода содир этилган деб ҳисоблаётган жиноятларни жавобгарликсиз қолдирмаслигини билдирган.

Айни пайтда, «қизил бюллетень» автоматик равишда халқаро ҳибсга олиш ордери дегани эмас. Бу Интерполга аъзо давлатларга шахсни топиш ва вақтинча ҳибсга олиш ҳақида сўров бўлиб, якуний қарор Интерпол томонидан кўриб чиқилади.

Исроил томони эса Туркиянинг ташаббусини рад этган ва уни танқид қилган.