9 май – Хотира ва қадрлаш кунига тайёргарлик дастури тасдиқланди

Бу ҳақда Президентнинг “9 май – Хотира ва қадрлаш кунига тайёргарлик кўриш ва уни ўтказиш чора-тадбирлари тўғрисида”ги қарори (PQ–139-сон, 2026 йил 16 апрель)да белгиланган.

Қарорга мувофиқ, барча тадбирлар “Бурч, жасорат, матонат!” шиори остида ўтказилади. Дастур доирасида маданий-маърифий тадбирлар, “уч авлод учрашувлари”, тасвирий санъат кўргазмалари, ижодий кечалар, танловлар ҳамда оммавий спорт мусобақалари ташкил этилади.

Шунингдек, Иккинчи жаҳон уруши қатнашчилари ва фронт орти меҳнат фахрийлари, мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилувчи органлар ходимлари оилаларига моддий ва маънавий ёрдам кўрсатилади.

Фахрийларнинг истакларига кўра, улар республика ҳудудидаги санаторийларга бир нафар кузатувчиси билан бепул юборилади.

Бундан ташқари, Тошкент шаҳрида 2026 йил 9 май куни соат 21:00 да байрам мушакбозлиги ташкил этилиши режалаштирилган.