Ўзбекистонда XI Европа кинофестивали ўтказилади

Европа кинофестивали доирасида бадиий, ҳужжатли ва анимацион фильмлар намойиш этилади. Киноасарлар оилавий муносабатлар, шахсий танлов, тарихий шахслар ҳаёти, дўстлик ва инсон тақдири каби мавзуларни қамраб олади.

Тошкентдаги намойишлар 23–25 октябрь кунлари Ўзбекистон Миллий кино санъати саройида ўтказилади. Урганчда эса 27 октябрь куни Худайберган Девонов номидаги кинотеатрда учта фильм намойиш этилиши режалаштирилган.

Фестивалнинг Тошкентдаги дастури 23 октябрь куни Литванинг «Киприк қоқишни унутманг», Франциянинг «Қор қоплонини излаб» ва Италиянинг «Эннио» фильмлари билан бошланади.

24 октябрь куни Кипр, Словения ва Греция фильмлари, 25 октябрь куни эса Люксембург, Латвия ва Руминия кинолари тақдим этилади. Урганчда Франция ва Люксембург ҳамкорлигида яратилган «Боғдаги қайиқ», Германиянинг «Карла» ҳамда Грециянинг «Момиқ айиқча ҳаётидан бир кун» фильмларини кўриш мумкин.

Шунингдек, 28 октябрь куни Британия Кенгашининг Ўзбекистондаги ваколатхонаси Ўзбекистон давлат жаҳон тиллари университети билан ҳамкорликда талабалар учун қисқа метражли фильмлар намойишини ташкил этади. Moc Hub маданий маконида ҳам кенг жамоатчилик учун фильмлар тақдим этилади.

Фестивал 2013 йилдан буён Европа Иттифоқининг Ўзбекистондаги делегацияси ва мамлакатда аккредитациядан ўтган Европа давлатлари элчихоналари томонидан ташкил этиб келинмоқда. Тадбир Ўзбекистон Республикаси Маданият вазирлиги ҳузуридаги Кинематография агентлиги кўмагида ўтказилади.

Барча фильмлар бепул намойиш этилади. Киноасарлар асл тилида, ўзбек ва/ёки рус тилидаги субтитрлар билан тақдим қилинади.

Намойишларнинг тўлиқ жадвали ва фильмлар ҳақидаги маълумотлар билан Ўзбекистондаги Европа Иттифоқи делегациясининг расмий саҳифасида танишиш мумкин.