Дорилар 6 баробар қиммат сотилган

Рақобат қўмитаси томонидан дорихоналарда дори воситаларининг белгиланган нархларга риоя этган ҳолда сотилиши бўйича назорат тадбирлари ўтказилди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси маълум қилди.

«Сирли мижоз» усулида ўтказилган тадбирлар натижасида бир қатор дорихоналарда айрим дори воситалари учун белгиланган нархлардан юқори қийматда нарх шакллантирилгани аниқланган.

Хусусан, «SHUNQORLAR» МЧЖга қарашли дорихонада:

«ПОЛИМИК® блистеры №10 (1x10)» дори воситасининг сотиш учун рухсат этилган нархи 12 837,18 сўм бўлган. Бироқ дори 70 000 сўмдан таклиф қилинган, яъни қарийб 5,5 баробар қиммат;

«КОНВУЛЕКС® Капли для приема внутрь 300 мг/мл» препаратининг рухсат этилган нархи 66 481 сўм бўлгани ҳолда, у 395 000 сўмдан таклиф этилган. Бу белгиланган нархдан қарийб 6 баробар юқори.

«MUNO FARM» МЧЖга қарашли Қорақамиш 2/5-мавзесидаги дорихонада «СТИМУЛОТОН» 50 мг №30 дори воситасининг рухсат этилган нархи 50 666,17 сўм бўлган. Аммо препарат харидорга 295 000 сўмдан таклиф қилинган.
Бу ҳолатда ҳам дори воситаси белгиланган нархдан қарийб 6 баробар қиммат баҳоланган

Шунингдек, «CITY FARM» МЧЖга қарашли дорихоналарда

«БАКТАМЕД 3,5 мл ампулы» препаратининг рухсат этилган нархи 18 849,43 сўм бўлгани ҳолда, 63 000 сўмга сотилган. Бу қарийб 3,3 баробар юқори нарх;
«НО-ШПА® 40 мг/2 мл ампулы №25» дори воситаси ҳам белгиланган нархдан юқори қийматда сотилган.

«HOSIL FARM» МЧЖга қарашли дорихонада эса:

«Лантус® СОЛОСТАР® 100 ЕД/мл 3 мл №5» препарати учун 20 фоиз устама қўшилгандаги рухсат этилган нарх 115 173,3 сўм бўлган. Аммо унга 80 фоиз устама қўлланиб, дори 190 000 сўмдан сотилган;

«СЛИДЕРОН» таблеткалари №20нинг рухсат этилган нархи 115 677,1 сўм бўлгани ҳолда, препарат 349 000 сўмдан сотилган. Бу қарийб 3 баробар юқори нархни ташкил этади.

Бундан ташқари, «AMIR FARM TRADE» МЧЖга қарашли дорихонада «БАКТАМЕД 0,5% 3,5 мл ампулы» дори воситаси учун рухсат этилган 20 фоизлик устама ўрнига 100 фоиз устама қўлланиб, препарат 32 000 сўмдан сотилган.

«FERUZA NUR MED» МЧЖга қарашли дорихонада эса «ПОЛИМИК® блистеры №10 (1x10)» дори воситасининг рухсат этилган нархи 12 837,18 сўм бўлгани ҳолда, препарат 62 000 сўмдан сотилган. Бу белгиланган нархдан қарийб 5 баробар юқори.

Шунингдек, «LEADER PHARMGROUP» ХК, «PHARM S GOLDEN» МЧЖ ва «RUSLAN BUYUK FARM» МЧЖга қарашли дорихоналарда «НО-ШПА® 40 мг/2 мл ампулы №25» дори воситаси ҳам белгиланган нархдан юқори қийматда сотилгани аниқланган.

Қандай чора кўрилди?

Қўмита маълумотига кўра, аниқланган қонунбузилишлар юзасидан белгиланган тартибда кўрсатмалар берилган.

Шунингдек, дорихоналарнинг лицензия талабларига риоя этиши масаласини қайта кўриб чиқиш учун тегишли ваколатли органга сўров юборилган.

Қайд этиш жоизки, дори воситалари нархининг белгиланган тартибда шакллантирилиши аҳоли учун муҳим масалалардан бири ҳисобланади. Айниқса, ижтимоий аҳамиятга эга препаратларнинг асоссиз равишда юқори нархда сотилиши истеъмолчиларнинг ҳуқуқ ва манфаатларига бевосита таъсир қилиши мумкин.

Муаллиф: Ҳасанбой ОЧУН