Ҳайвонларни рўйхатга олиш бўйича янги қонун кучга кирди

Қонунда ҳар турдаги ҳайвон учун алоҳида муддатлар белгиланган. Қорамол, қўй, эчки ва туялар туғилганидан 14 кун ўтгач, отлар эса 4 ойдан кейин рўйхатга олиниши лозим.

Чўчқалар учун бу муддат туғилганидан бир ой, ит ва мушуклар учун эса уч ой қилиб белгиланди. Айтиб ўтилган муддатлар тугагач, эгалари яна бир ойлик қўшимча вақт ичида ҳайвонни идентификация қилдиришлари керак бўлади.

Хорижий давлатлардан сақлаш ёки кўпайтириш мақсадида олиб кирилаётган ҳайвонлар ҳам эътибордан четда қолмаган. Улар мамлакатга кириб келган кундан бошлаб 21 кун ичида рўйхатга олиниши шарт.

Қонун ҳайвон ҳисобдан чиқарилиши тартибини ҳам аниқ белгилаб берди. Агар ҳайвон сўйилса, нобуд бўлса ёки мамлакатдан олиб чиқиб кетилса, бу ҳақда етти кун ичида тегишли идорага маълум қилиниши керак.

Хизматнинг ўзи ҳам маълум муддатларга бўйсунади. Ваколатли давлат органи вакили эгасининг мурожаатидан сўнг беш иш куни ичида ҳайвонни идентификация қилиши ва рўйхатдан ўтказиши лозим.