Ўзбекистон бўйлаб навбатдаги «Автомобилсиз кун» акцияси ўтказилади

25 июль куни Ўзбекистоннинг барча ҳудудларида навбатдаги «Автомобилсиз кун» акцияси ўтказилади. Бу ҳақда Экология миллий қўмитаси маълум қилди.

Ташаббуснинг асосий мақсади автотранспорт воситаларидан ҳавога чиқадиган зарарли чиқиндиларни камайтириш, экологик барқарор муҳитни шакллантириш ҳамда жамоат транспорти ва экологик тоза транспорт воситаларидан фойдаланиш маданиятини кенг тарғиб қилишдан иборат.

Маълум қилинишича, акциялар бошланганидан буён Экология миллий қўмитаси ва унинг ҳудудий бошқармалари ходимларининг 1730 дан ортиқ хизмат ва шахсий автомобилидан фойдаланиши чекланган. Бунинг натижасида атмосферага чиқариладиган зарарли ташламалар ҳажми ўртача 17 370 килограммга камайган, шаҳарлардаги тирбандликлар ҳам қисқарган.

Экология миллий қўмитаси эслатишича, «Автомобилсиз кун» ва «Автомобилсиз ҳафта» акциялари давомида давлат фуқаролик хизматчиларининг автотранспорт воситаларидан фойдаланиши жавобгарликка сабаб бўлади.

Қўмита давлат ва нодавлат ташкилотлари ҳамда барча фуқароларни акцияда фаол иштирок этишга, жамоат транспорти, велосипед, электромобиль ва бошқа экологик тоза транспорт воситаларидан кенгроқ фойдаланишга чақирди.