Тошкент метросида янги рекорд: бир кунда 1,18 миллион йўловчи ташилди

Тошкент метрополитенида йўловчи ташиш бўйича навбатдаги рекорд қайд этилди. 21 сентябрь куни метро хизматларидан 1 181 581 нафар йўловчи фойдаланди. Бу ҳақда метрополитен ахборот хизмати хабар бермоқда.

Бу 14 сентябрь куни қайд этилган аввалги рекорддан 16 031 нафарга кўп. Ўша куни метро хизматларидан 1 165 550 нафар йўловчи фойдаланган.

Метрополитен маълумотига кўра, йўловчилар оқимининг ортиб бориши муносабати билан поездлар ҳаракати йўловчилар талабига мослаштирилмоқда. Мутахассислар таҳлилларига кўра, октябрь ойида метронинг бир кунлик йўловчилар оқими 1,2 миллион нафарга етиши мумкин.

Шу муносабат билан метронинг 1 200 000-йўловчисини аниқлаш, унга махсус имтиёз ёки совға тақдим этиш режалаштирилган.
Айни пайтда метрополитеннинг ҳаракат таркиби ҳам янгиланмоқда. 2026 йилда харид қилиниши режалаштирилган 14 та замонавий ҳаракат таркибининг барчаси метро вагонлари паркига етказиб берилган.

Йўловчилар оқимининг ўсиши Тошкент метрополитенида ташиш қувватини ошириш ва хизмат сифатини яхшилаш масалаларини янада долзарб қилмоқда.