Ўзбекистонда “Шажара” ахборот тизими ишга туширилади

Ўзбекистон Миллий матбуот марказида «Ўзархив» агентлиги томонидан матбуот анжумани ўтказилди.

Унда архив соҳасидаги муҳим янгилик – «Шажара» ахборот тизими тақдим этилди.

Мазкур платформа орқали фуқаролар:

• ўз оила шажарасини электрон шаклда шакллантириши;

• аждодлари ҳақида архив маълумотларини излаши;

• тегишли давлат хизматларидан масофадан туриб фойдаланиши мумкин бўлади.

Тизим «ФҲДЁнинг ягона электрон архиви», давлат ва идоравий архивлар маълумотлари билан интеграция қилинади.

Шунингдек, Суд-экспертиза марказининг DNK маълумотлари асосида этник келиб чиқишни аниқлаш хизмати ҳам босқичма-босқич йўлга қўйилиши режалаштирилган.

«Шажара» ахборот тизими фуқароларнинг ўз тарихий илдизлари ва аждодлари ҳақидаги архив маълумотларини излаш имкониятларини кенгайтириши таъкидланди.

Бундан ташқари, 2026 йил 1 августдан давлат органлари ва ташкилотларида архив ишига оид ҳужжатлар электрон шаклда юритилади.