Қорақалпоғистонда уч киши ис газидан ҳалок бўлди

2025 йил 13 декабрь куни Қорақалпоғистон Республикаси Хўжайли тумани Саманкўл маҳалласи Фахрийлар кўчасида жойлашган уйда уч киши ис газидан заҳарланиш оқибатида вафот этди.

Туман ҳокимлиги матбуот хизмати маълумотига кўра, фуқаро А.Ж мазкур уйни ижарага олиб, икки нафар набираси билан яшаб келган. Уйни иситиш мақсадида фуқаро томонидан қўлбола иситиш печи ўрнатилган.

Маълум қилинишича, печнинг мўриси кесиб ташланиб, у бошқа хонага кўчирилган ва мўрисиз ҳолда газ тармоғига уланган. Натижада газ ёнишидан ҳосил бўлган тутун — ис гази уй ичига тўпланган.

Оқибатда фуқаро А.Ж ва унинг набиралари — 14 ёшли А.С (8-синф ўқувчиси) ва 10 ёшли А.Қ (4-синф ўқувчиси) кучли заҳарланиб, ҳодиса жойида вафот этган.

Ҳодиса юзасидан тегишли идоралар томонидан суриштирув ишлари олиб борилмоқда.