Аномал иссиқ: айрим ҳудудларда боғчалар ёпилди, чекловлар жорий этилди

Хоразм вилояти ҳокимлиги маълумотига кўра, Санитария-эпидемиология бошқармаси тавсияси асосида 14–17 июль кунлари вилоятдаги барча давлат мактабгача таълим ташкилотлари фаолияти вақтинча тўхтатилади. Давлат боғчалари ўз ишини 20 июлдан одатий тартибда қайта бошлайди.

Сурхондарё вилоятида ҳам жазирама сабаб транспорт ҳаракатига чекловлар киритилди. «Ўзгидромет» прогнозларига кўра, кундузги ҳаво ҳарорати 42–44 даража, айрим жойларда эса ундан ҳам юқори бўлиши кутилмоқда. Бундай шароитда асфальт қопламаси 70–80 даражагача қизиши мумкин.

Шу муносабат билан Термиз шаҳри, туман марказлари ва уларни боғловчи умумий фойдаланишдаги автомобиль йўлларида оғир юк автомобилларининг ҳаракати ҳар куни соат 10:00 дан 19:00 гача вақтинча чекланди.

Аввалроқ Қорақалпоғистон Республикасида ҳам аномал иссиқ туфайли давлат ва нодавлат мактабгача таълим ташкилотлари фаолияти вақтинча тўхтатилгани хабар қилинган эди.

Мактабгача ва мактаб таълими вазирлигига кўра, бундай қарорлар республика бўйича ягона тартибда эмас, балки ҳар бир ҳудуддаги об-ҳаво ҳамда санитария-эпидемиологик вазиятдан келиб чиқиб қабул қилинади.