Қорақалпоғистонда $2,6 млрдлик шамол электр станцияси қурилиши бошланди

Қорақалпоғистонда қиймати 2,6 миллиард доллар бўлган йирик шамол энергетикаси лойиҳаси амалга оширила бошланди. Лойиҳа Қўнғирот туманида барпо этилади ва унинг қуввати 1,5 гигаваттни ташкил этади.

Бу ҳақда Ўзбекистон президенти матбуот котиби Шерзод Асадов Қорақалпоғистонни комплекс ривожлантиришнинг навбатдаги устувор вазифалари муҳокама қилинган йиғилишдан сўнг маълум қилди. Йиғилишда президент Шавкат Мирзиёев ҳам иштирок этган.

Маълум қилинишича, ҳудудда электр энергияси ишлаб чиқариш ҳажми тўрт баробар ошиб, 5,33 миллиард киловатт-соатга етган. Бу кўрсаткич аҳоли ва тадбиркорлик субъектларининг йиллик электр энергияси истеъмолидан қарийб уч баробар юқори.

Қорақалпоғистонда қайта тикланувчи энергия манбаларидан электр ишлаб чиқаришни ошириш мақсадида Беруний ва Қораўзак туманларида ҳам шамол электр станциялари барпо этилмоқда.

Ҳозирда ҳудудда умумий қиймати 7 миллиард доллар бўлган 47 та янги лойиҳа бўйича қурилиш ишлари бошланган. Уларнинг таркибига Қўнғирот туманидаги 1,5 ГВт қувватга эга шамол электр станцияси ҳам киради.

Лойиҳа доирасида, шунингдек, 1,5 минг километр юқори кучланишли электр узатиш тармоқлари ва 500 кВ кучланишли учта подстанция қурилиши режалаштирилган.

Қорақалпоғистонда 2030 йилга қадар шамол электр станцияларининг умумий қувватини 3,3 ГВтга етказиш, «яшил» энергия улушини 76 фоизга ошириш ҳамда 400 МВт қувватга эга энергия сақлаш тизимларини барпо этиш режалаштирилган.

Муаллиф: Ҳасанбой ОЧУН