Спиртли ичимлик ичган шахс "участкавой"ни ўлдириб қўйди

Маълум бўлишича, "Юксалиш" маҳалласидаги хонадонлардан бирида оилавий можарога оид хабар асосида воқеа жойига участка профилактика инспектори, катта лейтенант Абдурасул Абдувалиев ҳамда маҳалла раиси А. Маматалиев етиб борган.

Аниқланишича, 65 ёшли маҳалла фуқароси Юнусали Холбозоров спиртли ичимлик истеъмол қилган ҳолда қариндошларига хўжалик пичоғи билан таҳдид солган.

Участка нозири Холбозоровни қуролсизлантириш ва тинчлантириш мақсадида унга яқинлашганда унинг кўкрак қисмига пичоқ билан зарба берган. Кўрсатилган тиббий ёрдамга қарамасдан, ҳуқуқ-тартибот ходими касалхонага етказилаётганда вафот этган.

Мазкур ҳолат юзасидан Жиноят кодексининг 97-моддаси 2-қисми "г" банди — хизмат бурчини бажариш чоғида содир этилган қасддан одам ўлдириш — билан жиноят иши қўзғатилди.

Жиноят содир этган шахс ҳодиса жойидан қочиб кетган. Ҳозирда уни қўлга олиш бўйича тезкор-қидирув ишлари олиб борилмоқда.

Ҳуқуқни муҳофаза қилувчи органлар ушбу шахснинг жойлашуви ҳақида маълумотга эга бўлган фуқаролардан энг яқин ИИБ бўлимига мурожаат қилишни ёки 102 рақамига қўнғироқ қилишни сўрамоқда. Бу борада хабар берган шахснинг шахснинг маълумотларини сир сақлаш кафолатланади.