Тошкентда кесилган 145 туп дарахт бўйича ҳокимлик изоҳ берди

Тошкент шаҳар Бобур кўчасида 145 туп арчанинг кесилиши жамоатчилик ва экологлар танқидига сабаб бўлди. Президент фармони билан жорий этилган дарахт кесиш мораторийсига зид ҳолат юзасидан текширув бошланди.

Тошкент шаҳар ҳокимлиги расмий баёнот бериб, кўча бўйлаб 83 туп пирамидасимон ғужум ва 62 мингдан ортиқ манзарали буталар экилиши режалаштирилганини билдирди. Баёнотда таъкидланишича, арчаларнинг кўпчилиги касалланган ва қуриб бораётган бўлган ва дарахтларни эҳтиёткорлик билан кўчириш режалаштирилган, аммо айрим масъуллар жараёнда талабларга тўлиқ амал қилмаган.

Экология вазирлиги кесилган дарахтлар оқибатида ҳисоб-китобларга кўра 620 миллион сўмдан ортиқ экологик зарар етказилганини маълум қилди. Ҳужжатлар расмийлаштирилиб айбдорларни жавобгарликка тортиш учун прокуратурага юборилган ва хизмат текшируви олиб борилмоқда.

Собиқ депутат, Экология вазири маслаҳатчиси Расул Кушербоев Яккасарой туманида 144 туп арча мораторийга зид равишда кесилганини маълум қилди. Гувоҳларнинг айтишича, ишлар ҳоким ўринбосари Баxтиёр Раҳмонов топшириғи билан тунги пайтда амалга оширилган.

«Эзгулик» жамияти раҳбари, ҳуқуқ фаоли Абдурахмон Ташанов ҳам ушбу воқеага эътироз билдириб, бундай ишлар жамоатчиликдан яширин тарзда эмас, очиқ ва шаффоф амалга оширилиши лозимлигини таъкидлаган.