Тошкентда экологик вазиятни яхшилаш бўйича махсус комиссия тузилди

 Бу ҳақда Президент матбуот хизмати хабар берди.

24 ноябрь куни Президент администрацияси раҳбари Саида Мирзиёева Тошкентдаги экологик вазиятни яхшилаш бўйича кечиктириб бўлмайдиган чораларни муҳокама этиш мақсадида йиғилиш ўтказганди. Унда экспертлар хулосалари асосида яқин, ўрта ва узоқ муддатли истиқболни ўз ичига олган комплекс таклифлар ишлаб чиқилди. Улар тезкор чоралардан тортиб, келгусида бундай ҳолатлар такрорланишининг олдини олувчи тизимли ечимларни қамраб олади.

Йиғилишда экологик назоратни кучайтириш, ифлослантирувчи объектлар фаолиятини чеклаш, қурилиш жараёнларига қўйиладиган талабларни қатъийлаштириш, шаҳарни кенг кўламда кўкаламзорлаштириш ҳамда ҳаво сифатини назорат қилишнинг замонавий тизимини яратиш бўйича вазифалар белгиланди.

Экологик чора-тадбирлар келгусида Президентга кўриб чиқиш учун тақдим этиладиган фармон лойиҳасининг асоси бўлиши таъкидланди.

Экология ва атроф-муҳитни муҳофаза қилиш қўмитаси раиси Хайрулла Ғаффоров таъкидлашича, ҳаво сифати муаммоси узоқ йиллик жараён натижаси бўлиб, уч асосий омил билан боғлиқ:

1. Иқлим ўзгариши ва кам ёғингарчилик. Орол денгизининг қуриши ва сув ресурслари камайиши натижасида арид муҳит шаклланган, бу эса чанг миқдорининг ортишига олиб келган.
2. Иссиқлик манбалари ва саноат корхоналари. Иситиш тизимлари, иссиқлик марказлари, ИЭСлар ва бошқа корхоналар ҳавога иссиқхона газларини чиқармоқда. Шамолнинг сустлиги ва атмосфера босими уларнинг жамланиб қолишига сабаб бўлмоқда.
3. Транспорт воситалари. Транспортдан чиқадиган зарарли моддалар, айниқса ёз ойларидаги яшил масканлар камайганида, ҳавода кўп миқдорда сақланиб қолмоқда. Дарахтлар барг тўкиши, шамол ва ёғингарчиликнинг етишмаслиги чанг ва зарарли моддаларни атмосферада ушлаб турмоқда.