Xitoyda chiqarilgan bolalar o‘yinchoqlari xavfli deb topildi

Jizzax shahridagi savdo nuqtalaridan birida o‘tkazilgan nazorat xaridlari davomida Xitoyda ishlab chiqarilgan ayrim bolalar o‘yinchoqlarida xavfsizlik talablariga nomuvofiqliklar aniqlandi. 

Mutaxassislar tomonidan “Elastik spiral ipli to‘p”, “Pinch” savdo belgili mushuk panjasi va “Avengers superhero” o‘yinchoqlaridan namunalar olinib, laboratoriya sinovlari o‘tkazildi. 

Sinov natijalariga ko‘ra:

• mahsulotlarda o‘tkir hid mavjudligi;
• himoya qoplamasining namlik ta’siriga chidamsizligi;
• mayda detallarning mustahkam biriktirilmagani;
• mexanik ta’sirga bardosh bermasligi;
• formaldegid miqdori me’yorlardan yuqoriligi aniqlangan.

 Mutaxassislar ta’kidlashicha, formaldegid nafas yo‘llari, ko‘z va teriga salbiy ta’sir ko‘rsatishi, allergik reaksiyalarni kuchaytirishi hamda bolalar salomatligi uchun xavf tug‘diradi. 

Shuningdek, o‘yinchoqlardagi mayda qismlarning osongina ajralishi bolalarning ularni yutib yuborishi yoki jarohatlanishiga sabab bo‘lishi mumkin. 

Tekshiruv davomida mahsulot yorliqlarida zarur ma’lumotlar davlat tilida ko‘rsatilmagani ham qayd etildi.

 Aniqlangan holatlar “Bolalar o‘yinchoqlarining xavfsizligi to‘g‘risidagi umumiy texnik reglamenti” talablariga zid deb topildi. Kamchiliklar yuzasidan savdo subyektlariga ogohlantirish xatlari yuborildi hamda ushbu mahsulotlarni savdodan chiqarish va realizatsiyasini to‘xtatish bo‘yicha choralar ko‘rildi.

Xalqaro me’yorlar, jumladan, Xalqaro standartlashtirish tashkiloti tomonidan ishlab chiqilgan me’yorlar va Yevropa Ittifoqida qo‘llaniladigan xavfsizlik talablariga ko‘ra, o‘yinchoqlar tarkibida xavfli darajadagi zaharli moddalar bo‘lmasligi, oddiy foydalanishga chidamli bo‘lishi hamda bo‘g‘ilish, zaharlanish yoki shikastlanish kabi xatarlarni kamaytiradigan tarzda ishlab chiqarilishi kerak.