Россия Днепр устидаги кўприкка зарба берди: беш киши яраланди

Бу ҳақда Запорожье вилояти ҳарбий маъмурияти раҳбари вазифасини бажарувчи Михаил Семикин маълум қилди.

Унинг айтишича, ҳужум оқибатида беш киши жароҳатланган. Улар орасида хизматга кетаётган Қизил Хочнинг икки ходими, икки аёл ва бир эркак бор.

Кўприк йўл қопламаси шикастлангани сабабли транспорт ҳаракати вақтинча тўхтатилган.

Украина Фавқулодда вазиятлар давлат хизмати маълумотига кўра, 5 октябрь куни кечқурун Запорожьега уюштирилган ҳужум вақтида дрон тўққиз қаватли турар жой биносига ҳам урилган. Бинонинг бешинчи қаватидаги хонадон ва олтинчи қаватдаги балкон ёниб кетган. Икки киши жароҳатланган.

Шунингдек, 6 октябрга ўтар кечаси Киевнинг Оболон туманидаги таълим муассасаси томида ёнғин чиққан. Ҳодисада жабрланганлар бўлмаган.

Аввалроқ Россия кучлари Киевдаги Днепр устидан ўтувчи кўприкларга ҳам кетма-кет зарбалар берган эди. Россия Мудофаа вазирлиги мазкур ҳужумларни тасдиқлаб, кўприклар Украина армиясига Донецк вилоятидаги қўшинлар ва ҳарбий юкларни етказишда фойдаланилишини билдирган.

Украина президенти Владимир Зеленский аввалроқ Россия йирик шаҳарларга ҳужумларни кучайтириб, уларни мамлакатнинг бошқа ҳудудларидан узиб қўйишга тайёрланаётганини айтган.