2025 yilning eng yaxshi fotosuratlari eʼlon qilindi

Nashr maʼlum qilishicha, tanlab olingan har bir surat tabiatning betakror goʻzalligi, uning nozik ekotizimi va inson oldida turgan masʼuliyatni aks ettiradi.

«Har bir surat tabiatning goʻzalligi va uning nozik tuzilishini namoyon etadi. Ularni birgalikda tomosha qilar ekanmiz, yoʻqolib ketish xavfi ostida turgan flora va fauna boyliklarini asrash naqadar muhim ekanini yana bir bor his qilamiz», — dedi National Geographic bosh muharriri Natan Lamp.

Toʻplamdan joy olgan suratlar orasida Braziliyaning Rio-Dose milliy bogʻida olingan yaguar tasviri alohida eʼtiborga loyiq. Ushbu suratni havaskor fotograf Fernando Fasiole mukammal kadrga olgan. National Geographic maʼlumotlariga koʻra, bu turga mansub yovvoyi mushuksimonlar Braziliyada oʻntadan kam qolgan.

Shuningdek, fotograf Brayan Skari AQShning Men shtati qirgʻoqlarida uch metrga yaqin oq akulani suratga olishga muvaffaq boʻlgan. Mutaxassislar bu hududda akula va boshqa dengiz hayvonlari sonining koʻpayishini 1972 yilda qabul qilingan «Dengiz sutemizuvchilarini himoya qilish toʻgʻrisida»gi qonun bilan bogʻlamoqda.

Kaliforniya shtati, Devis shahrida fotograf Karin Ayger gul ustida dam olayotgandek koʻringan asalarini tasvirga olgan. Surat oʻzining soddaligi va tabiiyligi bilan ajralib turadi.

Yana bir diqqatga sazovor fotosurat Janubiy Sudanda millionlab antipolalarning mavsumiy koʻchishini aks ettiradi. Afrika milliy bogʻlari va Juba universiteti tadqiqotlariga koʻra, bu dunyodagi eng yirik quruqlik migratsiyasi hisoblanadi. Ushbu manzarani fotograf Markus Vestberg suratga olgan.

Fotograf Stiven Uilks esa 18–36 soat davomida olingan yuzlab kadrlarni birlashtirib, Botsvanadagi suv havzasining betakror badiiy tasvirini yaratgan. Uning Day to Night («Tongdan tungacha») texnikasidagi yana bir asari Kanadadagi Malaspina boʻgʻozida dengiz sherlarini tasvirlaydi. Ilgari yoʻqolib ketish xavfi ostida boʻlgan ushbu tur himoya choralari natijasida asta-sekin tiklanmoqda.

National Geographic oʻquvchilar eʼtiboriga ushbu toʻplamdan yana bir qator betakror fotosuratlarni havola etgan.