2025 йилнинг энг яхши фотосуратлари эълон қилинди

Нашр маълум қилишича, танлаб олинган ҳар бир сурат табиатнинг бетакрор гўзаллиги, унинг нозик экотизими ва инсон олдида турган масъулиятни акс эттиради.

«Ҳар бир сурат табиатнинг гўзаллиги ва унинг нозик тузилишини намоён этади. Уларни биргаликда томоша қилар эканмиз, йўқолиб кетиш хавфи остида турган флора ва фауна бойликларини асраш нақадар муҳим эканини яна бир бор ҳис қиламиз», — деди National Geographic бош муҳаррири Натан Ламп.

Тўпламдан жой олган суратлар орасида Бразилиянинг Рио-Досе миллий боғида олинган ягуар тасвири алоҳида эътиборга лойиқ. Ушбу суратни ҳаваскор фотограф Фернандо Фасиоле мукаммал кадрга олган. National Geographic маълумотларига кўра, бу турга мансуб ёввойи мушуксимонлар Бразилияда ўнтадан кам қолган.

Шунингдек, фотограф Брайан Скари АҚШнинг Мэн штати қирғоқларида уч метрга яқин оқ акулани суратга олишга муваффақ бўлган. Мутахассислар бу ҳудудда акула ва бошқа денгиз ҳайвонлари сонининг кўпайишини 1972 йилда қабул қилинган «Денгиз сутэмизувчиларини ҳимоя қилиш тўғрисида»ги қонун билан боғламоқда.

Калифорния штати, Дэвис шаҳрида фотограф Карин Айгер гул устида дам олаётгандек кўринган асаларини тасвирга олган. Сурат ўзининг соддалиги ва табиийлиги билан ажралиб туради.

Яна бир диққатга сазовор фотосурат Жанубий Суданда миллионлаб антиполаларнинг мавсумий кўчишини акс эттиради. Африка миллий боғлари ва Жуба университети тадқиқотларига кўра, бу дунёдаги энг йирик қуруқлик миграцияси ҳисобланади. Ушбу манзарани фотограф Маркус Вестберг суратга олган.

Фотограф Стивен Уилкс эса 18–36 соат давомида олинган юзлаб кадрларни бирлаштириб, Ботсванадаги сув ҳавзасининг бетакрор бадиий тасвирини яратган. Унинг Day to Night («Тонгдан тунгача») техникасидаги яна бир асари Канададаги Маласпина бўғозида денгиз шерларини тасвирлайди. Илгари йўқолиб кетиш хавфи остида бўлган ушбу тур ҳимоя чоралари натижасида аста-секин тикланмоқда.

National Geographic ўқувчилар эътиборига ушбу тўпламдан яна бир қатор бетакрор фотосуратларни ҳавола этган.