2026 yildan chiqindi xizmatlari uchun toʻlovlar faqat onlayn amalga oshiriladi

Endi uyma-uy yurib toʻlov undirish amaliyoti toʻxtatiladi, deb xabar berdi Chiqindilarni boshqarish va sirkulyar iqtisodiyotni rivojlantirish agentligi.

Agentlik maʼlumotiga koʻra, mazkur chora-tadbirlar aholi uchun qulay toʻlov tizimini yaratish, hisob-kitoblarda shaffoflikni taʼminlash hamda korrupsiya holatlarining oldini olishga qaratilgan.

 Toʻlovlarni amalga oshirish usullari:
– agentlikning «Toza makon» billing tizimi orqali;
– barcha elektron toʻlov platformalari orqali;
– internet aloqasi yoʻq, olis hududlarda yashovchilar uchun bank kassalari va “Oʻzbekiston pochtasi” boʻlimlari orqali.

Shuningdek, chiqindi xizmati boʻyicha qarzdorlik mavjud boʻlgan isteʼmolchilarga SMS orqali xabardornoma yuboriladi va qarz toʻlanganigacha elektr energiyasi uchun toʻlov qabul qilish vaqtinchalik cheklanadi.

Yangi tizim doirasida aholi tez orada chiqindi mashinalarining kelish vaqti va yoʻnalishini onlayn kuzatish imkoniyatiga ham ega boʻladi.