AI-92 benzin narxi arzonlashtirildi

Davlat rahbarining aholini arzon va sifatli yoqilgʻi mahsulotlari bilan taʼminlash boʻyicha bergan topshiriqlari ijrosi doirasida Buxoro neftni qayta ishlash zavodida AI-92 rusumli avtobenzin narxini bosqichma-bosqich pasaytirish ishlari olib borilmoqda.

Bu “Oʻzbekneftgaz” AJning yoqilgʻi bozori barqarorligini saqlash, aholini yuqori sifatli benzin bilan taʼminlashga qaratilgan strategiyaning muhim qismi hisoblanadi.

Strategiya doirasida ishlab chiqarish jarayonlari optimallashtirilib, tannarxni kamaytirish boʻyicha kompleks chora-tadbirlar amalga oshirildi. Bunda benzin ishlab chiqarish hajmi ortib, narx kamaytirildi.

Natijada Buxoro NQIZda ishlab chiqarilgan AI-92 rusumli avtobenzinning birja savdolaridagi 1 tonnasi boshlangʻich narxi birinchi bosqichda 12 mln 881 ming soʻmdan 12 mln 628 ming soʻmga tushirildi. Bu esa oʻz navbatida, 1 litr AI-92 rusumidagi avtobenzinning birjadagi boshlangʻich narxi 9 400 soʻm degani.

Bu nafaqat isteʼmolchilar uchun qulay narx, balki butun bozorga ijobiy taʼsir koʻrsatadi.

 “Oʻzbekneftgaz” ichki bozorni rivojlantirish va isteʼmolchilar manfaatlarini qoʻllab-quvvatlash maqsadida yuqori oktanli yoqilgʻi narxlarini bosqichma-bosqich pasaytirish ishlarini davom ettiradi.