Oʻzbekiston Qozogʻistondan benzin sotib olishni boshladi

Unga koʻra, 2025 yilning birinchi yarmida Oʻzbekiston Rossiyadan olib kelingan neft va kondensat hajmini oʻtgan yilga nisbatan deyarli ikki baravar kamaytirdi.

Bunga Rossiya neftni qayta ishlash zavodlariga uyushtirilgan hujumlar oqibatida yonilgʻi taqchilligi yuzaga kelgani hamda «Gazpromneft»ning Fargʻona NQZga (Neftni qayta ishlash zavodi) «Transneft» va «KazTransOil» tizimlari orqali yoʻlga qoʻygan yetkazib berishlari toʻxtagani sabab boʻldi. Ushbu boʻshliqni qisman Astarxon va Salavat zavodlaridan kondensat tashish bilan qoplashga harakat qilindi.

Rossiya importining kamayishi fonida Turkmaniston va Qozogʻistondan xomashyo oqimi keskin oshdi. Jumladan, turkman xomashyosi eksporti qariyb besh baravarga koʻpaydi. Bundan tashqari, yil boshidan buyon Kiyanli (Petronas) va Qozogʻistonning Beles, Makat va Beyneu stansiyalaridan ham kondensat yetkazib berilmoqda.

Aviakerosinga talab oshgani ham qayd etildi. Asosiy hajm Rossiyadan Toshkentga olib kelingan boʻlsa-da, Belarus va Turkmanistondan keladigan hajmlar qisqardi. Yoz oʻrtalarida Toshkent aeroportida katta zaxira shakllantirildi va endi yonilgʻini mamlakatning boshqa aeroportlariga ham taqsimlash masalasi koʻrib chiqilmoqda.

Dizel yonilgʻisi importi ham oʻsdi, biroq benzin boʻyicha chetdan xaridlar kamaydi. Bunga mahalliy neftni qayta ishlash zavodlari ishlab chiqarish hajmini oshirgani sabab boʻldi. Shu bilan birga, Qozogʻiston benzini importi Oʻzbekistonga qariyb 10 baravarga koʻpaydi. Bu qoʻshni davlatning yirik NQZlariga eksport kvotalari berilgani bilan bogʻliq.