Namangandagi toʻrtta AYoQShda yaroqsiz benzin sotilayotgani aniqlandi

Xabarga koʻra, Vazirlar Mahkamasi huzuridagi "Oʻzenergoinspeksiya" hamda Raqobatni rivojlantirish va isteʼmolchilar huquqlarini himoya qilish qoʻmitasi hamkorligida Namangan viloyatidagi AYoQShlarda tezkor reyd tadbirlari oʻtkazilgan. 

Namangan tumanida joylashgan "E.P." va "X-2000" MChJlarga qarashli 2 ta avtomobillarga yoqilgʻi quyish shoxobchasida sotilayotgan avtobenzindan namuna olinib, laboratoriya tahlillaridan oʻtkazilgan. Shu jarayonda AI-92-markali avtobenzin davlat standart talablariga mos kelmasligi aniqlangan. 

Bundan tashqari, Namangan shahridagi "V.A." MChJ hamda Chortoq tumanidagi "Gʻ.H." MChJlarga qarashli AYoQShlarda ham neft mahsuloti sifatsiz ekanligi maʼlum boʻldi.

Mazkur holatlar yuzasidan qoidabuzarlikka yoʻl qoʻygan ushbu AYoQShlarda kamchiliklar bartaraf etilgunga qadar birja savdolarida ishtirok etishi vaqtincha toʻxtatilgan. 

Eslatib oʻtamiz, bundan oldin ham poytaxt Toshkent shahrining ikkita tumanida sotilayotgan AYoQShlardagi avtobenzinlar yaroqsiz ekani aniqlangan edi.