Andijondagi 40-ixtisoslashtirilgan maktabgacha taʼlim muassasasidagi imkoniyatlar (fotoreportaj)

Press-tur davomida Andijon shahridagi 40-ixtisoslashtirilgan maktabgacha taʼlim muassasasida tarbiyalanayotgan 3 yoshdan 7 yoshgacha boʻlgan bolalarga yaratilgan sharoitlar va imkoniyatlar bilan yaqindan tanishtirildi.

Mazkur, muassasa qoshida kunduzgi qatnov asosida tashkil etilgan "Gʻamxoʻrlik" guruhi faoliyatiga ham alohida eʼtibor qaratildi.

Ushbu turdagi kunduzgi guruhlarning yana bir muhim jihati shundaki, bunda chuqur aqli zaif bolalarni parvarishlash, imkoniyati darajasida sogʻlomlashtirish harakatlaridan tashqari ota-onalarni bolalar qarovidan ozod qilgan holda ularning bandligini taʼminlash, daromadlarini yaxshilash, eng asosiysi ijtimoiy-iqtisodiy tomonlama oilalarning jamiyatdagi faolligini oshirishni oʻz ichiga oladi.

"Gʻamxoʻrlik" guruhi faoliyati jismoniy, aqliy, sensor yoki ruhiy nuqsonlari mavjud, biroq sogʻligʻining holatiga koʻra alohida taʼlimga ehtiyoji boʻlgan 3 yoshdan 7 yoshgacha boʻlgan bolalar uchun qisqa muddatli parvarishlash va tarbiya berishga qaratilgan.

"Vazirlar Mahkamasining 46-sonli qarori asosida muassasamizda joriy yilning avgust oyidan yana bitta “gʻamxoʻrlik” guruhi tashkil etilgan. Hozirgi vaqtda maktabgacha taʼlim tashkilotimizda 11 ta guruh mavjud. Hozir bu yer 120 oʻringa moʻljallangan. Hozirgi vaqtda muassasamizda 117 nafar bola tarbiyalanmoqda", Normatova Odina 40-ixtisoslashgan maktabgacha taʼlim tashkiloti uslubchisi.  

Uning aytishicha, 40-sonli ixtisoslashtirilgan maktabgacha taʼlim tashkilotiga bolalar kerakli mutaxassislar koʻrigidan oʻtib, ularning xulosalari bilan “Inson” ijtimoiy xizmatlar markaziga ariza topshirish orqali qabul qilinadi.

Maʼlum boʻlishicha, Andijon viloyati boʻylab jami 6 ta mazkur turdagi kunduzgi xizmatlar yoʻlga qoʻyilgan. Hozirgi kunga kelib maktabgacha taʼlim muassasalaridagi ushbu guruhlar yetarlicha ehtiyojmand oilalarning farzandlarini qamrab olinmoqda.