“Urush vaziri ishdan boʻshatilishi kerak” — AQSh senatori

Dastlabki tergov natijalaridan xabardor manbalarga koʻra, bunga yaqin atrofdagi harbiy-dengiz bazasi haqidagi eskirgan razvedka maʼlumotlari sabab boʻlgan.

Nishon nega yanglish belgilangan?

28 fevral kuni Minab shahridagi Shajareh Tayyiba maktabiga berilgan zarba AQSh harbiylari qoʻshni Islom inqilobi qoʻriqchilari korpusi (IIQK) obʼektini nishonga olayotgan vaqtda yuz bergan.

CNN manbalariga koʻra, AQSh Markaziy qoʻmondonligi (CENTCOM) zarba koordinatalarini belgilashda Mudofaa razvedka boshqarmasi (DIA) taqdim etgan eskirgan maʼlumotlardan foydalangan.

2013 yilgi sunʼiy yoʻldosh tasvirlari maktab va IIQK bazasi bitta hududda boʻlganini koʻrsatadi. Biroq 2016 yilgi kadrlarda maktab bazadan devor bilan ajratilgani va alohida kirish yoʻli qurilgani aniq koʻrinadi. 2025 yil dekabr oyidagi tasvirlarda esa maktab hovlisida oʻynayotgan oʻnlab odamlarni koʻrish mumkin boʻlgan.
 

Foto: CNN

Izoh: Maktab sariq bilan belgilangan. Oq bilan chizilgan uzuq-uzuq chegara maktab va Islom inqilobi qoʻriqchilari korpusi binosi oʻrtasidagi devor.

Prezident Donald Tramp 11 mart kuni AQShning ushbu zarba uchun javobgarligi haqidagi dastlabki tergov xulosalaridan xabari yoʻqligini aytdi.

“Men bu haqda bilmayman” ,- deya javob berdi Tramp CNN muxbirining javobgarlikni boʻyniga olish haqidagi savoliga.

Avvalroq prezident zarbada Eronning oʻzini ayblashga uringan edi. Nima uchun uning maʼmuriyati bu daʼvoni qoʻllab-quvvatlamayotgani haqidagi savolga esa: “Chunki men bu haqda yetarli darajada bilmayman”, deb javob bergan.

Foto: Ekran yozuvi

Biroq, AQSh senatori Elizabet Uorren X ijtimoiy tarmogʻidagi sahifasida: “Tramp maʼmuriyati Erondagi qizlar maktabining bombardimon qilinishini tasdiqladi. Bu soʻnggi oʻn yilliklardagi eng halokatli harbiy xatolardan biri”, - deya yozib qoldirgan. Shuningdek, senator Trampning gaplari yolgʻonligini, AQSh Urush vaziri Pet Xigset ishdan boʻshatilishi kerakligini ham taʼkidlagan.

Eronning Mehr News agentligi tomonidan eʼlon qilingan va CNN tomonidan tasdiqlangan videolavhalar ekspertlar fikri toʻgʻriligini koʻrsatmoqda. Kadrlarda Amerikaning BGM yoki UGM-109 Tomahawk qanotli raketasi bazaga kelib urilgani, uning oʻng tomonida — maktab yoʻnalishida esa ulkan tutun koʻtarilayotgani aks etgan.

Eron rasmiylari vayron boʻlgan maktab oldida namoyish etgan qismlar Amerikaning Tomahawk raketasi qoldiqlariga mos keladi. Tramp esa Eronning oʻzida ham shunday raketalar borligini iddao qildi, biroq ekspertlar buni rad etmoqda.

Roytheon kompaniyasi tomonidan ishlab chiqarilgan ushbu raketalar faqat AQShning sanoqli ittifoqchilarida bor. Hatto Isroilda ham bunday raketalar mavjud emas.

Tergov davom etmoqda

Mudofaa vaziri Pit Xegset 10 mart kuni zarba boʻyicha puxta tergov oʻtkazilishini vaʼda qildi. U AQSh tinch aholi orasida talofatlarni oldini olish uchun barcha choralarni koʻrganini aytib, Eronni nishon tanlamasdan zarba berishda aybladi.

Oq uy matbuot kotibi Karolin Livitt ham tergov hali yakunlanmaganini va yakuniy xulosalarni kutish kerakligini taʼkidladi. Ayni paytda Pentagondan rasmiy izoh berish soʻralgan, biroq vazirlik hozircha sukut saqlamoqda.

                                                          Muallif: Maftuna BAXTIËROVA