Anora Sodiqova va Mirsaid Xaydarov oʻrtasidagi bahs davom etmoqda

Uning taʼkidlashicha, sud qarorlariga muvofiq, Mirsaid Xaydarov jurnalistlar va uni haqorat qilgan deb topilgan postlarni oʻchirishi hamda ochiq Facebook sahifasida uzr soʻrashi lozim boʻlgan. Biroq mazkur talablar bajarilmagani aytilgan.

Shu bilan birga, Anora Sodiqova Mirsaid Xaydarovning Toshkent viloyati hokimligida boʻlim boshligʻi sifatida faoliyat yuritgani haqida rasmiy manbalar mavjudligini bildirib, sud jarayonida ishlatilgan ayrim soʻzlar haqoratli ekani ekspertiza orqali aniqlanganini qayd etdi.

Ushbu bayonotlarga javoban Mirsaid Xaydarov ijtimoiy tarmoqlarda bir qator izohlar qoldirdi. U oʻzini Toshkent viloyati hokimligida boʻlim boshligʻi sifatida koʻrsatish notoʻgʻri ekanini taʼkidlab, bu maʼlumotni yolgʻon deya baholadi. Shuningdek, u ekspertiza xulosasida aniq adresat koʻrsatilmagani qayd etilganini bildirib, jamoatchilikni chalgʻitmaslikka chaqirdi.

Anora Sodiqova esa bunga javoban, Mirsaid Xaydarov mazkur maʼlumotlarni shaxsan oʻzi sud jarayonida aytganini taʼkidladi. Bahs davomida Xaydarov jurnalistlarni faktlarni tekshirmaslikda ayblab, professional jurnalistika talablariga rioya etilmayotganini bildirdi.

Mazkur muhokamaga ijtimoiy tarmoq foydalanuvchilari ham qoʻshildi. Xususan, Toshkent viloyati hokimligi rasmiy saytida Mirsaid Xaydarov haqida tegishli maʼlumotlar joylashtirilganini bildirib, «agar hokimiyatga aloqangiz yoʻq boʻlsa, bu haqda rasmiylarga ham ayting», deya izoh qoldirdi.

Ayni paytda sud ajrimi ijrosi qay darajada taʼminlanayotgani va Mirsaid Xaydarovning rasmiy lavozimi yuzasidan masʼul idoralar tomonidan rasmiy izoh berilmagan.