Batumidagi uylarning 6 foizini Markaziy Osiyoliklar sotib olmoqda

Galt & Taggart tahliliy kompaniyasi maʼlumotlariga koʻra, xaridorlar tarkibida Ukraina, Rossiya va Belarus fuqarolari — 20 foiz, Isroil — 16 foiz, Yevropa mamlakatlari — 12 foiz, Turkiya — 9 foiz, Arab davlatlari — 7 foiz, Markaziy Osiyo mamlakatlari — 6 foiz va Armaniston hamda Ozarbayjon — 2 foizni tashkil etmoqda.

Bugungi kunda Batumidagi yangi qurilishlarning asosiy qismi investitsion loyihalar hisoblanadi. Ular, asosan, tayyor holatdagi studiya turidagi kvartiralar boʻlib, 1 kvadrat metr uchun 1500–2500 AQSh dollari miqdorida baholanmoqda. Xorijlik xaridorlar bu uylarni asosan ijaraga berish yoki investitsion daromad olish maqsadida sotib olmoqda.

Tahlilchilar fikricha, 2029 yilga kelib qisqa muddatli ijaraga moʻljallangan kvartiralar soni ikki baravarga koʻpayishi mumkin. Biroq turistlar oqimi va ularning oʻrtacha yashash davomiyligi oshmasa, bu holat ijara bozoridagi daromaddorlikni kamaytirishi ehtimoldan holi emas.

Muttaxassislar taʼkidlashicha, Batumidagi koʻchmas mulk bozori investitsiya uchun jozibali boʻlsa-da, unda ortiqcha taklif va bozordagi to‘yinish xavfi ham mavjud.