Батумидаги уйларнинг 6 фоизини Марказий Осиёликлар сотиб олмоқда

Galt & Taggart таҳлилий компанияси маълумотларига кўра, харидорлар таркибида Украина, Россия ва Беларусь фуқаролари — 20 фоиз, Исроил — 16 фоиз, Европа мамлакатлари — 12 фоиз, Туркия — 9 фоиз, Араб давлатлари — 7 фоиз, Марказий Осиё мамлакатлари — 6 фоиз ва Арманистон ҳамда Озарбайжон — 2 фоизни ташкил этмоқда.

Бугунги кунда Батумидаги янги қурилишларнинг асосий қисми инвестицион лойиҳалар ҳисобланади. Улар, асосан, тайёр ҳолатдаги студия туридаги квартиралар бўлиб, 1 квадрат метр учун 1500–2500 АҚШ доллари миқдорида баҳоланмоқда. Хорижлик харидорлар бу уйларни асосан ижарага бериш ёки инвестицион даромад олиш мақсадида сотиб олмоқда.

Таҳлилчилар фикрича, 2029 йилга келиб қисқа муддатли ижарага мўлжалланган квартиралар сони икки бараварга кўпайиши мумкин. Бироқ туристлар оқими ва уларнинг ўртача яшаш давомийлиги ошмаса, бу ҳолат ижара бозоридаги даромаддорликни камайтириши эҳтимолдан ҳоли эмас.

Муттахассислар таъкидлашича, Батумидаги кўчмас мулк бозори инвестиция учун жозибали бўлса-да, унда ортиқча таклиф ва бозордаги тўйиниш хавфи ҳам мавжуд.