Janubiy Koreyada Markaziy Osiyo davlatlari ishtirokida sammit oʻtkaziladi

Bu haqda Yonhap agentligi Janubiy Koreya tashqi ishlar vaziri Cho Xyonning bayonotiga tayanib xabar berdi.

Vazirning taʼkidlashicha, mazkur sammit Seul uchun «Yangi shimoliy siyosat»ni rivojlantirish yoʻlidagi muhim qadam boʻladi. Ushbu tashabbus sobiq prezident Mun Chje In tomonidan ilgari surilgan boʻlib, Yevroosiyo hududida tinchlik va hamkorlikni mustahkamlash, xususan Markaziy Osiyo davlatlari bilan aloqalarni kengaytirishga qaratilgan.

Cho Xyon sammit nafaqat oʻzaro hamkorlikni mustahkamlash, balki taʼminot zanjirlarini diversifikatsiya qilish hamda mintaqadagi etnik koreyslar jamoasi bilan aloqalarni rivojlantirish uchun ham muhim platforma boʻlishini taʼkidladi.

The World Korea nashrining yozishicha, Koreya hukumati ushbu uchrashuv doirasida quyidagi yoʻnalishlarda hamkorlikni kengaytirishni rejalashtirmoqda:

• muhim foydali qazilmalar va energetika;
• sanoat va raqamli transformatsiya;
• transport va logistika;
• mudofaa va xavfsizlik;
• qishloq xoʻjaligi, iqlim va sogʻliqni saqlash.

Taʼminot zanjirining barqarorligi va diversifikatsiyasi Koreya iqtisodiy barqarorligining asosiy ustuvor yoʻnalishlaridan biri ekani qayd etilmoqda.

Hozircha Oʻzbekiston rasmiylari sammit sanalari yuzasidan izoh berganicha yoʻq.

Eslatib oʻtamiz, 2024 yil yozida Oʻzbekiston prezidenti 2025 yilda Seulda «Markaziy Osiyo — Koreya» formatidagi birinchi sammitni oʻtkazish taklifini maʼqullagan edi. Mintaqa davlatlari, shuningdek, «AQSh — Markaziy Osiyo», «Yevropa Ittifoqi — Markaziy Osiyo» va «Yaponiya — Markaziy Osiyo» formatlaridagi uchrashuvlarda ham faol ishtirok etib kelmoqda.