Baxtiyor Saidov uch mamlakat diplomati bilan koʻrishdi (foto)

Qayd etilishicha, Baxtiyor Saidov Yangi Zelandiyaning Oʻzbekistondagi elchisi etib tayinlangan Mark Julian Treynor bilan uchrashgan. Soʻng Saidov Yangi Zelandiya diplomati bilan qishloq xoʻjaligi, sanoatni rivojlantirish, yashil iqtisodiyot, tadbirkorlar oʻrtasidagi hamkorlikni yoʻlga qoʻyish masalalarini muhokama qilgan. 

Shuningdek, TIV rahbari Bosniya va Gersegovinaning Oʻzbekistondagi birinchi elchisi Ivan Orlichdan ishonch yorliqlarini qabul qilgan. Keyin diplomat bilan ikki tomonlama iqtisodiy sohada hamkorlik qilish uchun imkoniyat yaratish boʻyicha fikr almashgan. 

Bundan tashqari, Saidov Venesuelaning Oʻzbekistondagi elchisi Rosalba Lo Buye Antiko xonim bilan ham koʻrishgan. Uchrashuv davomida TIV rahbari Venesuela vakili bilan mamlakatlar oʻrtasida yangi qoʻshma loyihalarni ishlab chiqish hamda ularni amalga oshirish, parlamentlararo hamkorlikka koʻmaklashish, bilim almashinuvini rivojlantirish hamda boshqa masalalar yuzasidan fikr almashgan. 

Maʼlumot uchun, bugungi kunda Oʻzbekistonda 53 ta davlatning elchixonasi mavjud. Baʼzi davlatlarning Toshkentda doimiy elchixonasi boʻlmasada, ularning Oʻzbekistonga masʼul diplomatik vakolatxonalari boshqa mamlakatlarda (masalan, Qozogʻiston yoki Rossiyada) joylashgan.