Oʻzbekiston, Turkiya va Ozarbayjon oʻrtasida Anqara deklaratsiyasi imzolandi (foto)
Kecha, 29 yanvar kuni Oʻzbekiston, Turkiya hamda Ozarbayjon Tashqi ishlar vazirlari Turkiyada boʻlib oʻtayotgan forumda Anqara deklaratsiyasini qabul qildi. Bu haqda Oʻzbekiston TIV rahbari Baxtiyor Saidov oʻzining Telegram'dagi sahifasida maʼlum qildi.
Oʻzbekiston, Turkiya va Ozarbayjon oʻrtasida Anqara deklaratsiyasi imzolandi (foto)
Baxtiyor Saidovning yozishicha, u dastlab Turkiya Prezidenti Rajab Toyyib Erdoʻgʻan bilan koʻrishib, unga Prezident Shavkat Mirziyoyevning maktubini topshirgan.
"Turkiya Prezidenti Rajab Toyyib Erdoʻgʻanjanobi oliylari tomonidan qabul qilinganimizdan xursandmiz. Oʻzbekiston Respublikasi Prezidenti Shavkat Mirziyoyev janobi oliylarining eng samimiy salomlari va maktubini yetkazdik. Rahbarlarimiz oʻrtasida oʻrnatilgan birodarlik rishtalari har bir sohada yaqin hamkorlik qilish uchun eng mustahkam poydevor yaratmoqda. Ming yillik tarix, anʼana va urf-odatlar bilan bogʻliq boʻlgan xalqlarimiz farovon kelajakni barpo etish yoʻlida bir-biri bilan yaqindan hamkorlik qilmoqda", deya Saidov bu holatni qayd etgan.
Shundan soʻng, vazir Tashqi ishlar, savdo, iqtisodiyot va transportga masʼul vazirlar bilan birgalikda ikki-uch tomonlama uchrashuvlarni oʻtkazgan.
"Samarali diplomatiya, dinamik sarmoyaviy hamkorlik, savdo hajmini oshirish va aloqalarni kengaytirish orqali uch qardosh xalqlar nafaqat oʻzlari, balki vakillik qilayotgan mintaqalar uchun ham foyda keltiradi", deydi u.
Uning qoʻshimcha qilishicha, mazkur forumda faqatgina erishilgan yutuqlar haqida emas, balki eng dolzarb masalalar haqida ham muzokaralar olib borilgan.
"Uchrashuvimizning asosiy natijasi xalqlarimizning barqaror rivojlanishi uchun doʻstligimiz va hamkorligimizni mustahkamlash yoʻlidagi muhim qadam boʻlgan Anqara deklaratsiyasining imzolanishi boʻldi", deya bu holatni eslaydi vazir Saidov.
