Rossiya TIV “shaxsiy fikr” ortiga yashirinib, navbatdagi bahsli bayonotlarga javob berdi

Rossiya Tashqi ishlar vazirligi 2026 yil 15 yanvar kuni boʻlib oʻtgan navbatdagi brifingda teleboshlovchi va provokatsion chiqishlari bilan tanilgan Vladimir Solovyovning Markaziy Osiyo va Armanistonda Ukrainadagiga oʻxshash “maxsus harbiy operatsiya” oʻtkazish haqidagi chaqiriqlari yuzasidan berilgan savolga odatdagidek mavzu mohiyatidan chetlab javob berdi.

Rossiya TIV matbuot kotibi Mariya Zaxarova ushbu bayonotlarni tanqid qilgan jamoatchilik va ekspertlarni vaziyatni sunʼiy ravishda boʻrttirib koʻrsatishda aybladi. Uning taʼkidlashicha, Solovyovning fikrlari jurnalistning shaxsiy qarashlari boʻlib, ular Rossiya Federatsiyasining rasmiy pozitsiyasini aks ettirmaydi.

“Bu jurnalistning shaxsiy fikri. Fikr shaxsiy kanalda bildirilgan. Men iqtiboslarni oʻqidim va kontekstdan yulib olingan iboralarga tayanmayman. Bu holatga javob berish mening vazifam emas”, — dedi Zaxarova.

“Shaxsiy fikr” argumenti — ilk bor emas

Shunga oʻxshash holat 2024 yil yanvar oyida ham kuzatilgan edi. Oʻshanda NTV telekanalida tarixchi Mixayl Smolin oʻzbeklar millat sifatida kech shakllangani haqida bahsli fikr bildirgan, Rossiya TIV esa bu soʻzlarni ham “shaxsiy fikr” sifatida izohlagan edi.

Zaxarova bu safar ham oʻz pozitsiyasini bir nechta dalillar bilan asoslashga urinib, Solovyovning gaplari davlat telekanalida emas, balki “Solovyov LIVE” xususiy platformasida aytilganini qayd etdi. Shuningdek, u mazkur chiqishda qatʼiy bayonot emas, balki ritorik savol shaklidagi mulohaza borligini taʼkidladi.

Uning soʻzlariga koʻra, muammo Solovyov bayonotlarida emas, balki ularni kontekstdan yulib olib, Rossiyaning rasmiy pozitsiyasi sifatida talqin qilayotgan “divan tahlilchilari”dadir.

Zaxarova bunday talqinlarni ochiq provokatsiya deb atab, ular Rossiyaning sobiq SSSR davlatlariga nisbatan goʻyoki “tajovuzkor niyatlari” borligi haqida asossiz xavotir uygʻotishga qaratilganini bildirdi.

Dugin bayonoti fonidagi yangi savollar

Bu munosabat fonida Rossiyalik siyosiy mafkurachi Aleksandr Duginning soʻnggi bayonotlari ham alohida eʼtiborga tushmoqda. Dugin milliy davlatlar suvereniteti tugaganini iddao qilib, “milliy davlatlar — oʻtmish” ekanini ochiq aytdi.

Uning fikricha, milliy davlatlar vaqtinchalik hodisa boʻlib, kelajak “imperiyalar”ga tegishli. Bu esa, ekspertlar bahosiga koʻra, Oʻzbekiston va boshqa mustaqil davlatlar suverenitetini inkor etuvchi xavfli mafkuraviy signal sifatida qabul qilinmoqda.

Eʼtiborli jihati shundaki, Duginning bu bayonoti Solovyovning Markaziy Osiyoda “maxsus harbiy operatsiya” oʻtkazish haqidagi chaqiriqlaridan koʻp oʻtmay yangradi.

Ochiq qolgan savollar

Rossiya rasmiylari har gal bunday chiqishlarni “shaxsiy fikr” bilan cheklayotgan bir paytda, qator muhim savollar ochiq qolmoqda:
— Oʻzbekiston bunday ochiq mafkuraviy tahdidlarga qachon va qanday munosabat bildiradi?
— Bu bayonotlarga nisbatan diplomatik nota yoki rasmiy izoh beriladimi?
— Kimnidir “persona non grata” deb eʼlon qilish uchun yana nechta shunga oʻxshash chiqishlar yangrashi kerak?

Kuzatuvchilarga koʻra, Rossiya axborot makonida tez-tez uchrayotgan tajovuzkor ritorika uchun davlatning masʼuliyatdan oʻzini chetga olishi, bu kabi bayonotlarning oldini olish yoki ochiq qoralash niyati yoʻqligini yana bir bor namoyon qilmoqda.