Bu yil Oʻzbekiston hududida 137 million daraxt va butalar ekildi

2025 yil bahorida “Yashil makon” umummilliy loyihasi doirasida mamlakat hududida 137 million daraxt va butalar ekildi. 55 ta yangi “yashil bogʻ” barpo etildi — bu oʻtgan yilning shu davridagidan ancha yuqori.

“Mening bogʻim” loyihasi doirasida (fuqarolar “Ochiq byudjet” portali orqali ovoz beradi) 43,5 milliard soʻmlik 174 loyiha tanlab olindi. Bioxilma-xillikni saqlashga alohida eʼtibor qaratildi: 2 426 ta tuvaloq tabiatga qoʻyib yuborildi — bu oʻtgan yilgi koʻrsatkichdan uch barobar koʻp. 5 669 gektar maydonda shifobaxsh oʻsimliklar plantatsiyalari tashkil etildi. 349 mingta daraxt pasportlashtirilib, maʼlumotlar “Yashil makon” elektron platformasiga joylashtirildi.

Yil boshidan buyon vazirlik inspektorlari tomonidan 23 mingdan ortiq ekologik qonunbuzarlik holatlari aniqlangan. 40 mingdan ziyod profilaktik tadbirlar oʻtkazilgan. Havo, suv va tuproq holati boʻyicha ekologik monitoring 228 ta obʼektda amalga oshirildi, jumladan, Qoraqalpogʻiston Respublikasining 10 tumanida BMTTD koʻmagida yangi avtomatik stansiyalar oʻrnatildi. 46 ta korxonada yuqori samarali chang-gaz tozalash uskunalari va 18 tasida mahalliy tozalash inshootlari oʻrnatildi. “Toza havo” aksiyasi doirasida 250 mingdan ortiq transport vositalari tekshirilib, 36,3 tonna ifloslantiruvchi moddalar chiqishining oldi olindi. 1 164 ta avtomobil yuvish shoxobchasi tozalash tizimlari bilan jihozlandi, natijada 60 foiz suv tozalandi.

Ekologik ekspertiza sohasida 26 mingdan ortiq xulosa berildi — bu oʻtgan yilgi koʻrsatkichdan ikki barobar koʻp. Atrof-muhitga taʼsir qilishning I–II toifalariga kiruvchi obʼektlar boʻyicha 800 dan ortiq jamoatchilik eshituvlari oʻtkazildi.

Chiqindilar bilan ishlash sohasida Agentlikning toʻlov tizimi asosiy elektron platformalarga integratsiya qilindi. 66,3 milliard soʻmlik xizmatlar boʻyicha qarzlar hisobdan chiqarildi. Hozirda 7,2 million abonent, jumladan, 23,6 million aholiga chiqindi xizmatlari koʻrsatilmoqda. Davlat-xususiy sheriklik rivojlanmoqda: 50 xususiy kompaniya bilan 64 shartnoma imzolandi, 346,8 milliard soʻm investitsiya jalb qilindi, jihozlar sotib olindi va chiqindilarni yigʻish, ajratish va qayta ishlash infratuzilmasi yaratildi. Agentlik tomonidan qoʻshimcha ravishda 55 ta texnika va 20 ta konteyner sotib olindi.

Investitsiya sohasida umumiy qiymati 1,83 milliard dollar boʻlgan 10 ta loyiha amalga oshirilmoqda, shundan 1,27 milliard dollari — yangi loyihalar. Yilning birinchi yarmida 78,7 million dollarlik xorijiy investitsiyalar oʻzlashtirildi (rejaning 102 foizi), shundan 52,8 million dollari — toʻgʻridan-toʻgʻri xorijiy investitsiyalar, 25,9 million dollari — davlat kafolati ostidagi kreditlar.

Gidrometeorologiya xizmatida ham samarali natijalar koʻzga tashlandi: 7 ta avtomatlashtirilgan monitoring stansiyasi oʻrnatildi, 180 dan ortiq ob-havo va gidrologik prognozlar tayyorlandi, 11 marta togʻ hududlari uchun kuchli qor koʻchkisi toʻgʻrisida ogohlantirish berildi, 124 marta atrof-muhit ifloslanishi haqida maʼlumot eʼlon qilindi.

Oʻrmon xoʻjaligida 6 oy davomida 130 ming gektar maydonda oʻrmon barpo etish ishlari amalga oshirildi, shundan 126,2 ming gektar — qurigan Orol dengizi tubida. 746 tonna urugʻ tayyorlandi, 1 300 gektarga koʻchatzorlar tashkil etildi, 123 million koʻchat yetishtirilmoqda. Dorivor va oziq-ovqat oʻsimliklari plantatsiyalari hajmi 5 890 gektarga yetdi, 253 tonna mahsulot ishlab chiqarildi. Yer resurslarining barqarorligini oshirish maqsadida 701 gektarda oʻrmonzorlar va 41 gektarda terrasalar tashkil etildi. 31 ming gektar oʻrmon fondi ijaraga berildi, shu jumladan, 4 505 gektar ehtiyojmand oilalarga imtiyozli shartlarda berildi. Xitoydan 30 ming dona qogʻoz daraxti koʻchatlari olib kelinib, 88 gektarda plantatsiyalar tashkil etildi.

Ushbu koʻrsatkichlar Oʻzbekistonda ekologik barqarorlik va tabiatni muhofaza qilish boʻyicha kompleks va izchil yondashuv natijasi boʻlib, mamlakatning “yashil” rivojlanish va milliy hamda xalqaro majburiyatlarga sodiqligini yana bir bor tasdiqlaydi.