Бу йил Ўзбекистон ҳудудида 137 миллион дарахт ва буталар экилди

2025 йил баҳорида “Яшил макон” умуммиллий лойиҳаси доирасида мамлакат ҳудудида 137 миллион дарахт ва буталар экилди. 55 та янги “яшил боғ” барпо этилди — бу ўтган йилнинг шу давридагидан анча юқори.

“Менинг боғим” лойиҳаси доирасида (фуқаролар “Очиқ бюджет” портали орқали овоз беради) 43,5 миллиард сўмлик 174 лойиҳа танлаб олинди. Биохилма-хилликни сақлашга алоҳида эътибор қаратилди: 2 426 та тувалоқ табиатга қўйиб юборилди — бу ўтган йилги кўрсаткичдан уч баробар кўп. 5 669 гектар майдонда шифобахш ўсимликлар плантациялари ташкил этилди. 349 мингта дарахт паспортлаштирилиб, маълумотлар “Яшил макон” электрон платформасига жойлаштирилди.

Йил бошидан буён вазирлик инспекторлари томонидан 23 мингдан ортиқ экологик қонунбузарлик ҳолатлари аниқланган. 40 мингдан зиёд профилактик тадбирлар ўтказилган. Ҳаво, сув ва тупроқ ҳолати бўйича экологик мониторинг 228 та объектда амалга оширилди, жумладан, Қорақалпоғистон Республикасининг 10 туманида БМТТД кўмагида янги автоматик станциялар ўрнатилди. 46 та корхонада юқори самарали чанг-газ тозалаш ускуналари ва 18 тасида маҳаллий тозалаш иншоотлари ўрнатилди. “Тоза ҳаво” акцияси доирасида 250 мингдан ортиқ транспорт воситалари текширилиб, 36,3 тонна ифлослантирувчи моддалар чиқишининг олди олинди. 1 164 та автомобил ювиш шохобчаси тозалаш тизимлари билан жиҳозланди, натижада 60 фоиз сув тозаланди.

Экологик экспертиза соҳасида 26 мингдан ортиқ хулоса берилди — бу ўтган йилги кўрсаткичдан икки баробар кўп. Атроф-муҳитга таъсир қилишнинг I–II тоифаларига кирувчи объектлар бўйича 800 дан ортиқ жамоатчилик эшитувлари ўтказилди.

Чиқиндилар билан ишлаш соҳасида Агентликнинг тўлов тизими асосий электрон платформаларга интеграция қилинди. 66,3 миллиард сўмлик хизматлар бўйича қарзлар ҳисобдан чиқарилди. Ҳозирда 7,2 миллион абонент, жумладан, 23,6 миллион аҳолига чиқинди хизматлари кўрсатилмоқда. Давлат-хусусий шериклик ривожланмоқда: 50 хусусий компания билан 64 шартнома имзоланди, 346,8 миллиард сўм инвестиция жалб қилинди, жиҳозлар сотиб олинди ва чиқиндиларни йиғиш, ажратиш ва қайта ишлаш инфратузилмаси яратилди. Агентлик томонидан қўшимча равишда 55 та техника ва 20 та контейнер сотиб олинди.

Инвестиция соҳасида умумий қиймати 1,83 миллиард доллар бўлган 10 та лойиҳа амалга оширилмоқда, шундан 1,27 миллиард доллари — янги лойиҳалар. Йилнинг биринчи ярмида 78,7 миллион долларлик хорижий инвестициялар ўзлаштирилди (режанинг 102 фоизи), шундан 52,8 миллион доллари — тўғридан-тўғри хорижий инвестициялар, 25,9 миллион доллари — давлат кафолати остидаги кредитлар.

Гидрометеорология хизматида ҳам самарали натижалар кўзга ташланди: 7 та автоматлаштирилган мониторинг станцияси ўрнатилди, 180 дан ортиқ об-ҳаво ва гидрологик прогнозлар тайёрланди, 11 марта тоғ ҳудудлари учун кучли қор кўчкиси тўғрисида огоҳлантириш берилди, 124 марта атроф-муҳит ифлосланиши ҳақида маълумот эълон қилинди.

Ўрмон хўжалигида 6 ой давомида 130 минг гектар майдонда ўрмон барпо этиш ишлари амалга оширилди, шундан 126,2 минг гектар — қуриган Орол денгизи тубида. 746 тонна уруғ тайёрланди, 1 300 гектарга кўчатзорлар ташкил этилди, 123 миллион кўчат етиштирилмоқда. Доривор ва озиқ-овқат ўсимликлари плантациялари ҳажми 5 890 гектарга етди, 253 тонна маҳсулот ишлаб чиқарилди. Ер ресурсларининг барқарорлигини ошириш мақсадида 701 гектарда ўрмонзорлар ва 41 гектарда террасалар ташкил этилди. 31 минг гектар ўрмон фонди ижарага берилди, шу жумладан, 4 505 гектар эҳтиёжманд оилаларга имтиёзли шартларда берилди. Хитойдан 30 минг дона қоғоз дарахти кўчатлари олиб келиниб, 88 гектарда плантациялар ташкил этилди.

Ушбу кўрсаткичлар Ўзбекистонда экологик барқарорлик ва табиатни муҳофаза қилиш бўйича комплекс ва изчил ёндашув натижаси бўлиб, мамлакатнинг “яшил” ривожланиш ва миллий ҳамда халқаро мажбуриятларга содиқлигини яна бир бор тасдиқлайди.