Navoiyda daraxt kesgan fuqaro 52 mln soʻmdan ziyod jarimaga tortildi

Qayd etilishicha, Navoiy viloyati Ekologiya boshqarmasining tezkor nazorat guruhi xodimlari  tomonidan Qiziltepa tumanidagi Toʻdakoʻl dam olish maskani hududida nazorat reyd tadbiri oʻtkazilgan. 

Tadbiri davomida Karmana tumanida yashovchi huquqbuzar O.S. tomonidan Toʻdakoʻl dam olish hududida ikki tup jiyda, bir tup qayragʻoch va bir tup aylant daraxtlari hech qanday ruxsatsiz tag qismidan kesib tashlanganligi aniqlangan. 

Mazkur holat boʻyicha huquqbuzarga nisbatan Oʻzbekiston Respublikasi Maʼmuriy javobgarlik toʻgʻrisidagi kodeksining 79-moddasi 1-qismi bilan bayonnoma rasmiylashtirilib, 9 mln 375 ming soʻm jarima hamda 43 mln 125 ming soʻm tabiatga yetkazilgan zarar belgilangan.

Eslatib oʻtamiz, bundan bir necha kun avval Toshkent viloyati Yangiyoʻl tumanida daraxt kesganlar tabiatga 400 million soʻmdan ziyod zarar yetkazgani haqida xabar bergan edik.