Buxoroda yovvoyi hayvon goʻshtidan taom tayyorlanayotgani aytilmoqda

Unda yozilishicha, mazkur holat Qorakoʻl tumani Quvacha qishlogʻidagi "Tangem" nomli oshxonada kuzatilgan. Oshxona nomi ostida ochilgan Instagram'dagi "food.travel" blogida yuqoridagi holat yuzasidan video eʼlon qilingan.

"Ushbu videoda oshxona vakillari yovvoyi hayvon goʻshtlarini onkologiya va boshqa kasalliklarga davo sifatida tavsiya qilayotgani tasvirlangan. Ushbu iddaolar koʻpgina savollar va shubhalarni keltirib chiqardi, chunki bu kabi bayonotlarning ilmiy asoslari keltirilmagan", deyiladi xabarda.

"Ekologuz" jamoasi mazkur oshxona vakillaridan ushbu daʼvolarni ilmiy dalillar bilan asoslab berishlarini talab qilgan va bunday nohaq axborot jamoatchilikning sogʻligi uchun xavf tugʻdirishi mumkinligini eslatib oʻtgan. 

Bundan tashqari, xabarda oshxona tomonidan ishlatilayotgan yovvoyi hayvonlar goʻshti qayerdan olingani nomaʼlum ekanligi ham aytilgan. Jamoa ushbu jarayonlar qonuniy ruxsatlar asosida amalga oshirilayotganligini aniqlash va atrof-muhitni muhofaza qilish nuqtai nazaridan tekshirish uchun, Buxoro viloyati Ekologiya, atrof-muhitni muhofaza qilish va iqlim oʻzgarishi boshqarmasi tomonidan "Tangem" oshxonasi faoliyati oʻrganilishini soʻragan. 

Shuningdek, Buxoro viloyati Ichki ishlar boshqarmasidan videoda yovvoyi hayvon goʻshti kasalliklarga davo ekanligi haqidagi iddaolarni yolgʻon axborot deb hisoblab, videodagi shaxslarning harakatlariga huquqiy baho berishini talab qilgan.

"Ilmiy boʻlmagan va asossiz daʼvolarni ommaviy tarqatish jamoatchilikni chalgʻitish va ularning sogʻligʻiga xavf tugʻdirishi mumkin, shu sababdan bu kabi holatlarni qonuniy nazoratga olish muhim", deya qoʻshimcha qilingan tashkilot iddaosida.